تنويحه / شعر : على نوح
…….
جفت ينابيع البحور
اللي دموعها اتصعبت
على ذكريات
عشناها حبر بدون ورق
واللي فرق
خلاني أحس بلعبتك
لمسة إيديكي. الغشاشين
لحظة سلامك في اللقا
طب كنتي قولي
ان انتي طيف
وصعب أحسك يوم بشر
وإن الغرام في معبدك
غرقان لشوشته في الخطأ
وإن صلاتك والنسك ف العشق
دعوة للرياء
وإن أنا والشوق وقلبي
كنا فرجة للقدر
نشبه عرايس الماريونت
والخيط ف إيدك لفته
كانت عينيا غمضت
من وقتها حتى الممات
أو كنت برضو حأرتضي
أعيش معاكي في الخداع
بس بحزر
وأرعاكي من تحت الدجى
من هم ليل ناوي
يكتف بسمتك
وبدون خجل
أقطف عناقيد الغرام
من كرم قلبي وأطعمك
وأقتات أنا حصرم هواكي المندثر
لكن خلاص
جه وقت أنهي لعبتك
مش حأرضى تنبت بذرتي
في أرض باعت خصبها
من غير تمن
ما تنصبيش
على حلم مات يوم مولده
سيرك الصويت والنهنها
بل تركبي مهر المسأت التي
واقفة بتستنى الصدف
فوق الرصيف
على جسر أيامي وخطي ع المدى
تبني ف خيالك هيكلي
بإيديكي فجرا ترجميه يوم اللقا
دوسي أوي على أي حلم يرجعك
مش حأمنعك
ولا يوم أفكر أنتقم
بس أتركي لي بسمتك
في كاس حياة
لمست شفايفك شفته
يكون لي مروى
أستقوى بيه
وقت أما يجرف فرحتي
سيل العطش
…….
علي
إرسال التعليق
يجب أنت تكون مسجل الدخول لتضيف تعليقاً.