مبدعو مصر
انا البنت اللى مش عانس
وسنى .. عدى ع التلاتين
وانا البنت اللى بتوانس
بروح الناى. وصوت حليم
وانا البنت اللى ف حالها
وعيون الناس مبترحمهاش
وانا اللي مهما قالوا عنها
ميشغلهاش كلام الناس
وانا اللى جامدة فى مشاعرى
وبين نفسي بدوب احساس
وايه يعنى..
ف وسط التوهه والزحمة
الاقى عيال تقولى.. ياطنط
وايه يعنى..
الاقي العمر بيعدى
وانا بجرى وملحقهوش
وايه يعنى..
اشوف حلمى ولا اطلهوش
وايه يعنى..
تشوفنى الناس مش حلوة
وبرضه فيا بيعاكسوا
بشعرى ولا بحجابي
ومهما البس…
يشوفوا جسمى ..يتهمسوا
وايه يعنى..
الاقى الضحكة جوايا مبتضحكش
حاجات كتير بتتغير ومبترجعش
ملامحى ولبسى وكلامى
صحابي واهلي وجيرانى
بقيت ساكنة فى احزانى
بحوش فيها من صغرى
…
ماانا اتعودت انى احلم
والاقي نفسي جوا كابوس
وانا البنت اللى مهما تشوف
بتمشى علي الوجع وتدوس
مانيش خايفة من الدنيا
ولا حاسبه اللى راح منها
دانا اللى كل بتمناه
اعيش نفسي تفاصيلها
…
وانا البنت اللى مكبوته
وعايزة تحب
وانا البنت اللى محطوطة
ف خانه الكدب
انا الحاجة اللى مش حاجة
وانا اللى مشاعرى محتاجة
تعيش فى امان
…
وانا البنت اللى مغصوبة
على واحد مبتحبوش
وانا البنت اللى حبت حد
ولكن اهلها مردوش
انا البنت اللى طماعه
ف احلامها
وواخدها الحماس جدا
واناالبنت اللى مش موزة
لكن.. موزه اوى جدا
انا حاله ومش حالة
انا زاهدة ورحاله
وتايهه فيا جوايا
ومش عارفه فى يوم اوصل
…
وانا البنت اللى سابها حبيب
وعشمها فى يوم بجواز
وانا البنت اللى متباعه
عشان قايمه ودهب وجهاز
وانا البنت اللى لما اغلط ..
مبتعلمش
وانا اللى مهما كسرونى…
مبستسلمش
فاايه يعنى..
يكون حظى مع الدنيا كدا واكتر
وايه يعنى..
هيجى الفرح على بابى ويتنكر
فليه استكتر حاجات فيا
متسعدنيش
وانا العانس… ومش عانس
ومهما اكبر.. اناقلبي شباب
ولسه متمش العشرين
…
قصيدة