مبدعو مصر
يا قدسنا
يا عدرا منسيه
يا قدسنا
يا ميته حيه
يا لولى طالع من بحور الغرقانين
يا منوره صدر الصبايا المحرومين
الرجل معصوبه
والسكه معطوبه
وصبحتى مصلوبه علانيه
…
شعورك من سواد ليلى
مغطينى فى صبحيه
ودمعك بين رموش عينك
ندى بيعطش الميه
من بعد ما رخص الكلام
من عد ما انفض الزحام
لازم تكونى نار فى ضلمة غربتك
وتنورى سكك الرجال من دمنا
من دمنا المطلول على سفوح الجبال
من دمنا
من دمنا الجارى بحور فى بطون الرمال
يا قدسنا بيتى اتحرق زى الزيتيه والعيون
المسجد الأقصى أتحرق
أكبر بيوت الدين
والصبر كان زيت السراج
فى معراج الأنين
أنا مش ح أموت
أو يوم ح أفوت ع الظلم
وأنحى السلام
…
أنا شعب عمره منز ألاف الألام
لازم أعدى بمركبى بحر الظلام
وأضرب بسيف الحق خداع السلام
وأقتل كلاب الحرب تجار الحرام
وأقبل أسف الرمله بعنيا
مارجعش أبداً ولو رجعت
مش برجليه يا مدينة الأديان
يا معالم الأنان
يا عدرا منسيه يا ميته حيه
يا قدسنا يا قدسنا
