مبدعو مصر
أنا الواد اللي سلف روحه لصحابه
على النوتة
أنا الطفل اللي فرحه كبير
في وقت سماعه حدوته
أنا برج الحمام والنهر
أنا التوتة
أنا الواد اللي عاش يحلم
وسرقت حلمه بنوته
قالت عينيها
عن بنت لسه باحبها جدا
في عينيها حزن يكفي هذا الكون
لما مرار الدنيا كان يطغي
شفايفها اطعم قطعتين بونبون
كات لسه واقفه قصادي في الشباك
وانا كنت واقف لسه في البلكون
خدني الحنين ورماني ع الناصيه
عاشق بدرجة ليلي والمجنون
اصل الحكايه تبتدي بنظره
والنظره صابت قلبي فى المضمون
خدنا الهوي لجنينة الاسماك
خدني وفتح لي في قلبها شباك
قالت عينيها باعشقك. باهواك
وانا قلبي عيل
تخيل
عاش في دي الحاله
من غير قواله قالت لي باتمناك
انا اللي مسمعتش كلام زي دا
قبل هذا اليوم
صاحبت ليلي. وحدتي. البلكون
وبنت واقفه قصادي ف الشباك
سابت عينيها تقول لي باستناك
وعزلت م الكون.