مبدعو مصر
ارم حمولك قصيدة مكتوبة بدموع الحروف للشاعر الدكتور خلف كمال
ارم حمولك
النوم اللي بيهرب مني هجيبه
والفكر اللي بيصطادني
ومقدرش افرفص منه
هعمل ميّت يايسيبني ياأسيبه
النوم طايح ف بلاد الله الواسعه
بيدور ع البنت حبيبتي
اللي مخبيه ف ضي الصبح عنيها
والورد الهيمان ف خدودها حدودها
والليل اللي بيحلف بجدودها
الشعر ده منه
والنسمه اللي بتسكر من شم عطورها بتشهد له
يبقى النوم هيجيني ازاي ومنين
وانا رحت منفض له عبايتي
حضرت القهوة زيادة
مهو حبّ النوم اللي بيحب حبيبتي عباده
أنا تايه من يوم مادخلت الدنيا وحكولي عن امي
وفرحتها بعد ولادتي
بتزغطط أول مااتحركت ومليت الأوضه صراخ
والصبح اللي بيحضني
ويهدهد جوايا الدمعه
ويولع على قبر ابويا أول شمعه
امي بتشحت لي من حبايبها هدومي
بستبشر اني اعيش
ومكنتش اعرف اني أماّّيا للموت مش سامعه
سايباني قبل مايطلع لي الريش يامايا؟ّ
يبقى منين هيجيني النوم
وانا ع الفرشه امصمص ف صوابعي
مين اشكي له همومي ومواجعي
يبقى النوم هيجيني ازاي
لما كبرت راح كبر الفكر معايا
بقى ابويا وامي وصاحبي وضلي وخلي
لكن بياخدني للنار ويودي!
على كل هموم الدنيا يعدي!
اااه م الشوك اللي بيغرسه فيا
ده بيروي بدموعي الصبار
وانا وسط البحر الموج بيشيلني وبيحط
ولا مركب باينة ف دروبي ولا شط
يبقى النوم هيجيني ازاي ومنين
ده اكيد داير بيدور لي على
البنت اللي بتشبه امي
زي ماحكولي عليها ف حنانها ورقتها
ويجيني الحلم
وانا ماشي معاها ع الترعه
بتقولي اعدل قامتك
متخليش ضهرك محني
خليك راجل واوعي اشوفك زي كتير
م الخوف محني
اقرا ف سيرة عنتر وابو زيد
واقرا ف سيرة والدك
اما يدافع عن شرف الغيط
مش عاوزاك تصحى وتنام موجوع
بتفكر في الطفل الراقد ياكله الجوع
او يتمنى يروح الجنه ومش عاوز للدنيا رجوع
دايما لما بتيجي صورة الطفل المرمي جنب البحر
بتملا حكاياتنا دموع
نعمل ايه
النوم داير ع العدل
بيحاول يسترضيه
ويدخله جوه قلوب الخلق
ويعيد البسمة لوجوه دبلانه
ويعيد الأمن اللي مهاجر دارنا ودنيانا
وبيحي ضمير الانسان جوانا
فر الى الله
وارم حمول الكل عليه
هو معاك
شايف الخير والنور جواك
يسمع شكواك
انده له دايما واتحصن بيه
والجأ له دايما تلاقيه
يمحي جراحك
يبعد عنك كل اذى م الدنيا الفانيه
انت نسيت انك ممكن تفارقها ف ثانيه
انت نسيت انك ممكن تفارقها
قد يهمك أيضا