ألأمة / شعر : السعيد قنديل

الامة من جهلها صبحت ما هيش أمة
واتعودت ع الخرس والكره والغمة
تلمها من هناك
تتبعتر اللمه
وتلمها من هنا
تلقى الجسد رمه

فريده فى كل شىء
فى العجرفه واللوم
وساعة الجد تلقاها سحابة نوم
وتقوم تفرفط رزايا مؤذيه وسامه
والامه من جهلها 
صبحت ما هيش أمه

الامه أجمل ما فيها انها بتنسى
وفى لحظة الكرب تتغابى قوى وتقسى
تكره ولادها وتتعاهد مع الاعداء
وكأن فعل الخيانه فيها زى الداء
بغداد تضيع كلها وتنسى مين بغداد
وينتحر شعبها ولاتفتكرش عباد
بلاد يا خدها الوبا
وبلاد تبيدها أوغاد
والامه نايمه ولا نخوه ولا زمه

الامه لو كات نظم أنا كنت اقول ما اريد
وألعن أبوها ولو كانت دما فى وريد
والبس عليها السواد حتى فى يوم العيد
واحجب ضيا الشمس عنها وابتدى التعديد
واعلن قرار الحداد واسعى لكل جديد
واتمنى من كل قلبى تنتهى الغمه
والامه من جهلها
صبحت ما هيش أمه

الامه من جبنها تاهت عن العزه
ولا همهاش دمنا لما غسل غزة
دم الولاد الصغار ولحم ناسنا الكبار
فوق التراب اللى صار
محتاج لميت هزه

الامه سا ل دمها أنهار كنهر النيل
وبا لفرات الجثث وبدجلة كومة ويل
فى الليل يزيد أّنها ويطول علينا الليل
وفى النهار العويل والدمع نازل سيل
واحنا فوارس الخطب والشجب والتهليل
وأعظم ما فينا بيتدارى ورا الهلاهيل
والرقص والحنجله ولعب العصا والخيل
وان قامت الدنيا 
لا قومه ولا همه
والامه من جهلها
صبحت ما هيش أمه

الامه يا طول عزاها فى اللى راحوا بلاش
واللىاتنهب منّها واللى اختفى ولا جاش
أوباش ومن قلبها وأوباش من الاوباش
متجمعين كلهم واحنا اللى ضعنا بلاش
متفرقين من زمان ولا حد قابل حد
وفى ساعة الكرب نتغابى وناكل بعض
أعداء على بعضنا واصحاب مع الاعد اء
والكره بات فى الحشا زى الوبا والد اء
ماتوا الالوف مننا واحنا فضلنا شتات
وان بد أت المعمعه تلقانا هشيم وفتات
وان قامت الحرب 
لا صحبه ولا لمّه
والامه من جهلها
صبحت ما هيش أمه

الامه تاجروا الكرام فيها بدمانا كتير
وسوّقوا لحمنا بقرار وزير وخفير
وملّكونا لعدانا وصرنا ملك الغير
وصبحنا أجرا فى بلدنا زى أىأجير
وان حد منا نطق يصبح سجين وأسير
مستعبدين كلنا ولا حد فينا كبير
والظلم زاد والعدو أصبح علينا رخ
ماتوا خواتنا ولا حدّ ش نطق قال أخ
والكل شال بلوته سلم وطاطى ونخ
والعدل راح من سمانا وزادت الغمه

والامه من جهلها
صبحت ما هيش أمه
واتعودت ع الخرس
والكره والغمه

اترك تعليقاً