أحلام ع القمر / شعر : سميرة الاسريجى

——
بحلم ساعات
إنى ف مكان
متعرفوش سكة ألم
مكان بعيد عن اى ارض
جايز يكون بعد القمر
مكان بسيط أجمل مافيه
هو انه خالى من البشر
من أى كدبه أو رياء
أو حتى حاجه لكبرياء
مكان يبان إنه بسيط
مرسوم طريقه بالوفاء
بالمحبه والموده
بالرضا ويالعطاء
مفهوش ندم ولافيه عتاب
ولاحتى فيه غدر الصحاب
والحلم يرجع ينكسر
اول ماتييجى الزكريات
مع دمعه تنزل ع الخدود
و قلب مسكين يكتشف
انه وحيد مش لاقى ايد
ترجع الدم الوريد
فارجع من الحلم بكابوس
لكنى بصحى بصوت ونيس
وايدين حنونه تضمنى
وصوت اذآن يرجع
الروح للنفوس
وايدين حنونه مطبطبه
تسأل سؤال حب ووفا
باإيه يانونه بتحلمى
جنبك أنا اتطمنى
ف ترد عينى بكام سؤال
لو دمعتى سببها البشر
م اللى بيمسح دمعتى
كان بردوا حد من البشر
وارجع و اقول كله بقدر
ازاى يكون طعم الحياه
لو عشنا فيها بدون ونس
من غير صحاب يبقوا الامان
اوقات شعورنا بالخطر
يبقوا ابتسامة فرحنا
وحضن دافى يضمنا
ويحسنا بعد الغياب
حتى لو كان الغياب
عن بعضنا
من غير سفر
—-
سميره الاسريجى
ماما نونه