ابداعات أدبية

نيفين الطويل وقصيدة بالعامية جديدة

نيفين الطويل وقصيدة بالعامية جديدة

 

ماتحسبهاش

حسابك موت اوانه ماجاش
وقلبك طفل ما اتهجاش
بيعرف بس يتحكم
في حاجه بجد مكسوره
وضلمه وغش ف الصوره
مشاعر واضحه مطموره
ومقصود قصد تتعتم
راهنت عليك خلاف قولهم
رفضت اتملي ف حلولهم
وجيتلك قمت رحتلهم
ونظرى الحاد كان غشاش
يجوز انا كنت مبهوره
ب قلب كلامه كان بكاش
كلامك تلج قرب باش
فأحسنلك

ماتحسبهاش

ياصاحبي الصعب اغوارك
صحيح جيتك وانا عاشقه
فا تهت ف بحر اوزارك
لكن خلصت ماهيش فارقه
واه ضحيت وماندمتش
هواك سلمت ماسلمتش
مانيش محتاجه ل ملاذك
كفايه تفوق ل ذوارك
تلبي الشعب لو عاذك
تأدي مهام ادوارك
وقلبي ف ايدى سهل اداويه
اذن ماعليك ماتهتمش
وحتي ان جرحي ماتلمش
هايفضل برده متهمش
يدق ما ادق ولا اعلل
ولو حكمت ب ايدي اطفيه
ماعنديش قلب يتزلل
مفيش تعليم قلوب ببلاش
فاحسن لك
ماتحسبهاش

حبيبي الحب مش ب زرار
ماهوش ثوره
يجوز ممكن يحررنا
ومع ذلك
مافيش ولا داعي ل مناوره
ها نفضل برده مش ثوار
ولو قلبك ميدان تحرير
فا قلبي انا اصله م الاحرار

فالو بعدك قرار غالب
فاكن صادق ولو مره
انا اللي دفعت من روحي
لاعمرى طالبت ولا هاطلب
فالو في حسبه مغلوطه
انا اللي حسبتها وجلت
ااقل بخمسميت مره
جروح ف القلب تتخلد
وروح عن حلمك اتخلت
حاولت اوزنها فا اختلت
خلاص قررت ما اوزنهاش

فاحسن لك واحسن لي مانحسبهاش

نيفين الطويل
نيفين الطويل

 

 

التالى:

الوسوم

أسماء مصطفى

كاتبة صحفية تدرس اللغة العربية لها مجموعة من المقالات الفنية والثقافية المختلفة.. عضو جمعية مبدعى مصر ..
إغلاق