مش لاقي الغنوه.. قصيدة بالعامية المصرية للشاعر: أشرف الشناوي
مش فارقه معاك
انك عايش أو ميت
مش فارقه معاك
انك تحلم أو حتى تطير
أو تطلع من عش الدبابير
مش فارقه معاك الشمس
ان طلعت أو غابت
أو دفت في حيطان الببت
أو لأ
أو نفسك يخلص م الزق
مش فارقه معاك
المشاوير
أو روحك تفضل في البير
مش فارقه معاك
تموز من امشير
خلصت خلاص الحواديت
لميت العمر في عبك
وزهقت من الركنه
وم العتمه
والعفاريت اللي ليلاتي
ناصبين لك في محاكمه
والنوم اللي بيطير
من عينك
ويدق في قلبك مسامير
الخوف
ويزق في روحك بالعافيه
فتحس عروقك مش دافيه
والدم بيتجمد في الشريان
وتلاقي الباقي في عمرك
عريان
مش لاقي الغنوه
اللي تعديك
م الليل المليان اموات
وقبور مليانه بعضم المجاريح
مش قادر تصلب طولك
وتغربل في الوجع
اللي ماليك
يمكن تلقالك ضحكه تعديك
أو تلقى في عمرك
حته براح… تقعد ترتاح
أو فجر يوضيك
مش عارف تهرب منك فيك
أو تهرب م الموت اللي واقف لك
مستنيك..
اقرأ المزيد:
ندي معوض ويكيبيديا.. من هي السفيرة اللبنانية في واشنطن