ابداعات أدبية

مساجلات شعرية بين نبيل مصيلحى ومحمد عبد القوى حسن

قصيدة بعنوان”محمد عبد القوى”كتبها الشاعر نبيل مصيلحى

محمد عبد القوي

يا وش الصبح الباسم جوايَّا
يا المادد كفك بالخبر للناس
يا الشجرة الطارحه باحساس
قلبك عمران بالخير والنور
متشكر لوجودك جنبي
بالحب الدافي الصافي
قنديل بتنور في حياتي
بيحبك جدا ( بحر مويس )
وبيهمس لـلــ ( عدوة )
لكل ( المنيا )
لكل الوجه القبلي .. وبحري
بينكم راجل على حق الحق
بيقول الحق ..
وحروفه دايما بتنز الحق
مبدع على حق
نعناعك لسه مرعرع
على شط العيد والحب
موال في قلوب الناس
يا ( محمد ) .
يا ابو عبد القوي
يا أصيل ..

من اخوك

نبيل مصيلحى

—————————

وعبد القوى يرد بقصيدة بعنوان” نبيل مصيلحى”

نبيل مصيلحى

من خد الصبح الطارح ورد  ومجد  وذوق

من مهد الشهد المتهادى لروحك

من نيل ايامنا الصافى

من روح مشاويرنا الخضرة

من عتبة قلبى

لحد مقام فتوحاتك

صلواتك

كل امنياتك ليا

انا شايفك فوق من بين سماوات الذوق

بتهادى تراضى تباشير الفجر النادى

وتقول ” لـ مويس” يامويس انا جايب صحبى

حبيبى المنياوى

لجل مانصطاد من قلبك

حواديت الرحلة

فامنحنا فؤادك يامويس

وهادينا رضاك

تتلم الصحبة الراقية

ونعبى بطن الموال بقصايد طازجة

وكالعادة

تتغلب انت على القعدة

يامصيلحى ياخويا

من قلب بنى عامر والعدوة

وحبيبة قلبى المنيا لقلبك

مشاوير مسافات

لكن يقطعها الحب الساكن فى عروقنا

ف سوانى ويجيلك

نفسى اعديلك والله ياصاحبى

\نفسى اعديلك

بس ادينى فرصه

افك الجبس اللى قدمى

وبسرعة اجيلك

اخوك

محمد عبد القوى حسن

المنيا فى 4 ابريل الساعة الواحدة ظهرا

الوسوم

محمد عبد القوى حسن

محمد عبد القوى حسن رئيس مجلس الأدارة
إغلاق