موقع إخبارى شامل

كنا زمان .. قصيدة بالعامية للشاعر / معاوية كيلاني المهدي

و كنا زمان ..
بنصحى الصبح نتسحّب
ونفرك من عينينا النوم
وكله فـ إيده سنارته
وكام حتة عجين بالتوم
و كنا كمان
نجيب طعمية م السخنة
وحتة لفت .. ويّا العيش
عشان نفطر
وياما زمان كمان دوخنا
عشان بنلاقي وسط الهيش
سمك أكتر
وكان القلب يتنطط
مع السفاريت و لمعتها
وندعي يااارب
وفيصل أخويا بيخطط
هناك في البيت لعلقتنا
في حفلة ضرب
وكنا زمان ما نزعلشي
ونركب تاني قطر الصيد
ولو علقتنا تذكرته
ونصحى الصبح نتسحب
ونفرك من عينينا النوم
واحشنا البحر و حجارته
و كنا عشان ما نتطمن
عشان الخطة تتأمن
بنصحى الصبح و نفنن
ونقنع فيصل العاقل
وبنظبط له سنارته
وكنا زمان
بنشعبط مع الأحلام
كانت أيااااام !!!!
لا يتوفر وصف للصورة.
قد يهمك أيضا
.
.

التعليقات مغلقة.