كل ده كان ليه | شعر: سناء عبد الوهاب
كل ده كان ليه | شعر: سناء عبد الوهاب
كل ده كان ليه
يااحلي من طعم المجاز فيا
خليتي شبكك فيا أغنية
وبقيتي وحدك امنياتي وبس
اول رسالة لربنا هي
سيبتي العياط علي كتفي ومشيتي
هزيتي جزع في روحي متكسر
خليتي حتي العمر يتحسر
وأسأل شوارع توهنا في ترابها
سيبتيني ليه
بكتب في حظي الدنيا
مش إفيه
برسم عنيكي وكل ده كان ليه
لماانتي اضعف حتة في وريدي
ضميتي عمري وسيبتي ليه إيدي
يجي الشتا يسألني عن حالك
اسكت في قول مالك
واضحك عشان اداري من همي
طب كنتي حتي في مرة تهتمي
واشرب ظنوني واقول بتعمل ايه
طب كل ده كان ليه
حضنك كوفيه في عز خوف أمشير
زادني الغياب سلطة علي التفكير
حبيت أساوتك بانعدام تقدير
برسم في ضحكك ارتوي تخدير
واكتب في سري الحبر وأبكي عليه
وأسأل عنيكي الدبلانين في الحلم
كان يجري إيه لو تنصفيني في شوق
وأسأل مشاعرك
كل ده كان ليه
عيار في هم الحب متنازل
قلبي الضعيف دقاته في النازل
والليل سكوته بيقلق العاشقيين
خض الحنين الغربة فاتغابت
ازاي في حضرة عشقنا غابت
رصيت وعودك قمت تاني بكيت
خفيتي عقلي وردتيني مشيت
وناديتي من فوق الخيال رديت
وافضل اهاتي
كل ده كان ليه
لو كان غنايا في البكا مقدر
يوصف ويقدر يختصر مسافات
لو كنت اقدر احضنك لحظات
فترد روحي بدون مانسأل بعض
برصاصة منك بالكلام مَرة
ورصاصة من صرخة عياط مُرة
دوبتي فيا العمر كام مَرة
وانتي اللي ليا
وكل ده كان ليه
