قصيدة شعر بالعامية المصرية للشاعر: عادل زوين
صباحك مزهزه يا شقلشه
وقلها ولكن بتوب دروشه
و تايه محشش شرب وانتشي
فلا انت داري ولا يفهمون
مع ان مخك منور سليم
و حجمه ما قلِّش بفعل الرِجيم
فقِّلش و قول ده الشيطان الرجيم
موسوس ونحن الجميع عائزون
فمن قلب هذا السرير الحرير
نويت اني لازمن وحتماً اطير
وارشح جنابي لمقعد وثير
و انتم جميعاً لنا ناخبون
و عندي برامج لكل الجميع
لسوسن لليلي و عبد السميع
و هل يعني ضايع هيرجع يضيع ؟!
و لا فارقه خالص ولا يحزنون
و بوعدكوا اني حقيقي هضيف
هشمم جنابكم هواءاً نضيف
و اوسع عليكم في قطر الرغيف
و اضيف عالبطاقه لارنج و زتون
واحب اني اطمن محبي الحشيش
مفيش ان تنزل تجيب ما تلاقيش
هتقضي في بُرههه مسافه مفيش
كأنك جنابك ببتقضي لمون
هناقش غلاء الفيلر و البوتكس
ولازم ازود في باقه فليكس
و من اي حاجه بتختم بإكس
هوفرها ليكم و بيكم هكون
قيلا اختشولنا و روحوا اللجان
وعلم علي القفه من غير ودان
ده رمز المحبه و أسمع كمان
هشيلها لوحدي وكله يهون
و اشوفكم بعافيه كمان كام سنه
ارتب حياتي وانول المني
واعيشها مزهزه و ادوق الهنا
انا منكو ليكو يجيكوا طاعون
………….
#عادل زوين
اقرأ المزيد:
إلى حبيبي محمد مغاوري.. من شعر العامية المصرية للشاعر البرمبالي
مش لاقي الغنوه.. قصيدة بالعامية المصرية للشاعر: أشرف الشناوي
ندي معوض ويكيبيديا.. من هي السفيرة اللبنانية في واشنطن