موقع إخبارى شامل

قصيدة جديدة بالعامية للدكتورة الشاعرة مني المنير

إفضل ابكي ع اللي راح
واشكي م الاه والجراح
واندب الحظ القليل
لو تنَوَّر قول دا ليل
عيش مكسّر عيش ذليل
قول زمان كان ياما خير
قول كمان و عيش أسير
كلبش الايد بالألم
يا ابني قوم دا مش مهم
يبقى ليك فلوس كتير
تبقى عامل او أجير
المهم تبقى راضي
و النهار يعدي هادي
السعاده مش فلوس
حاجه ساكنه في النفوس
حد يبقالك سند..و انت تبقاله المدد
لمتك ويّا الصحاب
دعوتك لو تستجاب
طبطبة ابوك عليك
لقمه سخنه جوا بيت
فرحة أمك لمّا جيت
حضن بالحب اتسع
أب بيصلي بوَرَع
وشه متوضي بسلام
علمك معنى الامان
و الحنان..والاحتواء
فوق كده ..
لما يبقالك وطن
عزوتك هوا السكن
و باديك
تسنده ما راح يقع
اوعى تبقى انت البقع
كون شريف خليك جدع
و الاكيد..
السعاده في الرضا
يلا دا اليوم ابتدا
كل درب و ليه حكايه
ابتديها م البدايه
و امشي فيها واحده ..واحده
تلقى نور م الضلمه جَيّ
يغمرك افراح و ضَيّ
يملا روحك بالفرح
يشفي جرح اللي اتجرح
و الحياه على ده و ده
في الكتاب كله اتشرح

 

قد يهمك أيضا

د. منى المنير :يكرمها مؤتمر العامية بنية مصر فى بورسعيد الشهر القادم

مؤتمر العامية السادس ( معدية مصر ) في بور سعيد يتحدى المؤسسات الثقافية في مصر

الشاعرة مني المنير في قصيدة جديدة

من هي ملكة جمال سيدات العراق لسنة 2021

التعليقات مغلقة.