قصيدة بالعامية للشاعرة وفاء بغدادي

109

قصيدة بالعامية وفاء بغدادي

لما كان أنا عندى أم وكنت بافطر
ع اللبن بتحط شاى
من عنيها باحط سكر
أمى مبتشربش قهوة بس تعملها عشانى
واما أقول أشربها سادة
تقوللى ياه يامغلبانى
مش كفاية مر عمرك..
قبل ما يجيلك ملانى
حطى سكر.. باسمع الكلام وأفطر
لما كان أنا عندي أم وكنت بافطر
كل يوم تحكى لى حلم هو نفس الحلم ذاته
شفت خير… شفت خير
شفت مركب حاضنة طير
شفت أحزانك ف عينك بس ويا الحب ماتوا
شفت دمع أيوة دمع
افرحى لو نام شوية
وازرع الحلم ف سكاته
ارسميه… بكرة هيوصل
كنت أشوف واسمع وافسر
لما كان أنا عندي أم وكنت بافطر
كل يوم تسألنى فوءة ناكل ايه
كنت اخاف تطلع وتتعب
كنت أقول أللى تجبيه
عيش وملح أنا راضية بيه
الشوية ف أيدها يكتر
لما كان أنا عندى أم وكنت بافطر
لما كنت أعمل جهاز كان يعورنى الحديد
من أديها تصب مرهم م الوريد
اضحكي.. بتقولها ليا
الحزن مش شاطر بليد
وهى فى المرايا باكية
للسما رافعة وشاكية
واما أنجح تبقى حاكية
كل ما هالقاك فوق
قلبى م الأحزان يفوق
وأبقى أكبر
النهاردة أمى هى مش معايا
وجالى سكر
لما كان أنا عندي أم وكنت بافطر
#وفاء _بغدادى
من ديوان البنت اللى وضتها السما

قصيدة بالعامية وفاء بغدادي

قد يهمك أيضا :الجواز .. قصيدة بالعامية للشاعر عبد الهادي الشعراوي

التعليقات مغلقة.

error: