موقع إخبارى شامل

قاهر وظافر ودايس بشعبك على المستحيل . إلى عبد الفتاح السيسي ــ حبيب مصر

قاهر وظافر ودايس بشعبك على المستحيل
ــــ
إلى عبد الفتاح السيسي ــ حبيب مصر
ــ
كلامك جميل وطيب أصيل
موافق هوى الناس الطيبين
خرج لك نخيل البلاد البعيده
وشجر الريحان
وورد الجناين
وعطر الزمان
طواعيه خارج
يقول لك مبايع
يقول لك معاك
لأنه بقلبه اللي شايف أمانُه
وحَس بكيانه
بأنك زعيم
خرج يومها يهتف ..
معاك خُد إيدينا لبر السلامه
معاك يا بن بلدي
بدون قلب خايف
نهدّ الشرور
نخطي الموانع
نعدي الجسور
ونقطع إيدين اللي عايز يدمَّر
ويحرق في أمَّه رعاها الإله
أرددوا بكل السُبل يجرحوها
أرادوا بكل الحيِّل يعدموها
أرادوا ركوعها لغير الإله
أرادوا يقصُّوا جناح اليمامه
عشان تبقى دايماً على الأرض خايفه
في حضن الضلام
عشان تبقى تابع لفكر اللئام
عشان تبقى عاله
ضعيفه ذليله تبوس الأيادي
أرادوا .. وأراد الإله غير طموحهم
فعز بمشيئته هوى المخلصين
وذل بمشيئته خُطا الطامعين
وكانت علامه في وش الزمان
وقمره بهيَّه ..
تصحصح بشوقها غرامك يا ( نيل )
كلامك جميل وطيب أصيل
موافق هوى الناس الطيبين
كلامك يا صادق
دوا للقلوب اللي عطشت سنين
كلامك صراحه وصبح ونهار
كلامك كلام الرجال الكبار
كلامك كلام الزعيم اللي عاشق
تراب الوطن
وحالف ليبقى عزيز طول حياته
وفوق الرؤوس
على كل محنه وأزمه يدوس
ولو شوفت مره ف كلامك تجاره
وصنعه ومكاره
هاكون ثوره واقفه في وشَّك أقول لك
كفايه .. كفايه
لكني عشقت في كلامك بساطه
ولمسة طيابه ونبرة زعامه
وصدق وحنين
كلامك جميل وطيب أصيل
ومين اللي كاره تكون مصر دنيا
ما هي أم فعلاً لكل الوجود
وبنت الأصول وأم الحضاره
وأم الثقافة وأم الفنون
إلى كل جاهل بــ ( مصر العظيمه )
يا واقع في ريبه تفزَّك / تهزَّك
فبُص لتاريخ اليونان القديمه
وشوف الفلاسفه
ودهشة عيونهم
دي مصر ( اغتوتهم ) كهانة زمان
بكل الفنون والعلوم علمتهم
أصول الكلام
فحقك يا مصري تكون الإمام
ونبض العروبه
لأنك بتكتب بدمك مصيرك
وترسم خريطه خطوطها الوضوح
بدون اننهاء المشاعر في بكره
بدون الجراح
بدون الخيار المحيَّر لفكرك
بدون انتهاء البدايل لحلمك
بتنقش وجودك في عين الحياه
ونورك دليل
كلامك جميل وطيب أصيل
موافق هوى الناس الطيبين
يا قائد جيوش الأمان المرابض
وحارس جفون العيون الوطن
وقاهر وظافر ودايس بشعبك على المستحيل
رباطك متين .. متانه بتقسم ضهور التشتت
وتمحي وجوده
فسير بإذن الإله في طريقك
دليل كل عاشق
يكون سلسبييل لهذا الوجود / لهذا الزمن
ولا يوم تفكَّر بإنك علامه على وش مايَّه
دا نقشك علاهه ومليون علامه
بتروي خلودها غيطان الوطن
دي مصر الأمانه
وهيَّه الخلود
فبُص ف مراية الحقيقة النضيفه
تلاقي الزعامه بتصنع تاريخ
تلاقي الزعامه بتصنع بطل
فخطي يا ( سيسي ) معاك كل خطوه
في حرب وسلام
رعاك الإله لــ ( مصر ) الوطن
ــ
نبيل مصيلحي
الجمعة 3 من يناير 2020

اترك رد