اخبار عاجلة

في القلب حزن .. شعر: اسماعيل محمود

في القلب حزن
حكاياته ليه مبتنتهيش
وأمال و صبر
نهار وليل علشان يعيش
وحلم فارد دمعته
على جناح امنيته
في ليل طويل
يتمنى ضى مبيلاقيش
وروح بتترجى اللي كان
فجر الزمان
ييجي يحسسها بأمان
ليه مبيجيش
راح اللي راح من عمري
في سوق الجراح
تمن الصباح والفرح
دول غالين علي وممعيش
وهمومي ساكنه البال
وصفحات الدموع
منقوشه في جدار الليالي
بريشة الألام مبتتمحيش
وبكرا خايف م اللي جي
واليأس زي الريح معاند
خطوتي في سكتي
يارياح همومي
حاسبي لو مره عليا
وبين ضفاف أيامي
يافكره شقيه متكسريش
شراعات مراكبي
ولمراسي موتي
ياريت يازمن متودينيش

 

في القلب حزن
في القلب حزن

اقرأ/ى أيضا:

الوسوم

عبد الله محمد عبد القوى

مدير التحرير ..كاتب وشاعر مصرى ..صحفى بمجلة "مبدعو مصر"، عمل فى مجال الصحافة منذ كان عمره 12عاماًـ يكتب فى الجرائد الورقية والمجلات الالكترونية...عضو مجلس ادارة جمعية مبدعى مصر.
إغلاق