موقع إخبارى شامل

غلبتيني | شعر: حازم القاياتي

غلبتيني
بروح ساكته ولا كلمه
بعجز الحرف والجمله
يا بنت الإيه يا واحشاني
يا مفروده علي شال الغروب
شالك ، وانا حالك ومحتالك
غلبتيني ، وكل ما اقول تصالحيني
الاقي الكون بيتشبك يعبي من الظنون عِبك
وليه بالفكر نتعكر ونكتب جمله محفوظه
يا بنت الإيه يا محظوظه
يا شارده من دافا البرواز ،يا عامله من الضلوع
سكه ، وبتفكي الحنان فكه
غلبتيني ، بدل ما تكملي ديني
بنكسر كل يوم روحنا ، ويصحي الصبح من بوحنا
بيتألم ، ويجرح صوته في الملكوت
خلاص كل اللي فات بيموت
فلو عايزاني اعيش مبسوط ،، تسامحيني
غلبتيني …..!!
قد يهمك أيضا

التعليقات مغلقة.