موقع إخبارى شامل

ضحكه من النوع المستعمل شعر : ناصر محسب

ضحكه من النوع المستعمل شعر : ناصر محسب
…….
من غير تفاصيل
أنا مش هوه
الحزن بينحت من جوه
ف بَبَان هَيٌكل
أوجاع على روحي بتتفصل من غير مقاسات
ضحكه من النوع المستعمل وقت العوزه وقت الأزمات
ف يمر الحزن ويستبدل
شكلي بدوبلير
مع إن ملامحي مهيش هيه
ضل ومكسور
يطلع مني ويسكن فِيِّه
وبكل فجور يخرج بشويش
اِضحك علشان الصوره تعيش
من غير ما الحزن يعلقها
أحلام والواقع صدقها
وحرقها الخوف
على نفس مسار قلبي المكسوف
خذلتني عيونها ونظرتها بخسوف كِلي
من غير تفاصيل
لسه فاضلي
ذكرى بتندهلي من امبارح
ودموع بتسامح أوجاعها
نظره وبقيت من اتباعها
ومُريد ف الحضره بيطوح
والقلب رياته بتتمرجح
سيباها الروح لبخور يتسحب وياخدها
الدنيا بتربط ف عقدها
والضحكه بتخلف مواعيدها
وخطوط الخوف مين حددها صبحت بالعرض وقد الطول
من غير تفاصيل
أنا مش هوه
وكأني بديل

 

قد يهمك أيضا

بعد الحب بشوية شعر /جيهان النجار

التعليقات مغلقة.