اهم القضاياابداعات أدبية

شعر ليبى عامى ..أنـــي تعــبت .. شعر : أشرف الزرقاني ( أسير النجع )

 

شعر ليبى عامى ..أنـــي تعــبت .. شعر : أشرف الزرقاني ( أسير النجع )

(( أنـــي تعــبت ))

أني تعبت هلبة يا غوالي راني
وما عاد عندي يا غوالي حيل
أني كُنت مجني عليه وإلاّ الجاني
والدمع ع الخدين صاير سيل
مليت م الوحدة وميل زماني
نحساب روحي دوم وافي الكيل
مليت من بختي إللي حا داني
والحال أسود من سواد الليل
مليت من قلبي إللي شقـاني
والعين دبلت ع الهموم إتميل
يا هم همي وهم من خلاني
يا ويل ويلي وفوق ويلي ويل
أني تعبت
***********
ما عاد عندي نيّة … زعم يا غوالي تصدّقوا وتكذبوا
حتى عيوني ع النظر معمية … وباقي حواسي تبهدلوا وتعذبوا
أني اليوم ما دسيت عنكم سية … ويشهد الله تشرّدوا وتحنذبوا
آهي حروفي مبعثرة ومرمية
وآهي قصيدة متركنة ومنسية
وآهي أشعاري كُلها مطوية
تنزف كما المجروح جرح قتيل
أني تعبت هلبة يا غوالي راني … وما عاد عندي يا غوالي حيل
***********
ما عاد عندي جهد نمشي بروحي … نبي الوفا ديمة معاي إيسير
مليتّ من كثرة نزيف جروحي … ومليت من هزوة وجرح الغير
هددت عيني كان يوم تنوحي … نجبد عروقك نحذفك في البير
هدْتها نعميها
وما يوم نشبح بيها
علي طول ما جابت إيدي نرميها
أني حُر ما عمريش كُنت دليل
أني تعبت هلبة يا غوالي راني … وما عاد عندي يا غوالي حيل
***********
يـارب هوّن دايــا … وأجعل طريقي زاهية وفوّاحة
يـارب كون معايـا … وأجعل حياتي كُلها مرتاحة
وخفف عذابي وحيرتي وشقايا … ملّيت من عيني إللي نواحة
ما حد بيا حسْ
والنار فيا إتلسْ
مليت بس وبس
من صغر سني فـــ الهموم إنشيل
أني تعبت هلبة يا غوالي راني … وما عاد عندي يا غوالي حيل
أني تعبت

صفحة مبدعو مصر على الفيس بوك

مع تحيات الشاعر / أشرف الزرقاني
( أسير النجع )_ ليبيا

مهرجان دوز الدولى للشعر الشعبى فى دورته السادسة يناقش قضايا هامة

شوفت أمي .. نبيل مصيلحى يبنعى والدته فى قصيدة

الوسوم
إغلاق