مبدعو مصر
أنا رحت بلاد وفسرت الاحلام للناس
طفت بروحي علي سماوات غير السبعه
ولا فيها نجوم ولا ينفع شمس تنورها
ولا قمره تونس لياليها
علي غير العادة أو المألوف
حتي تظن انك ع الارض
سماوات اشتات
ونجوم اموات
ونهارها سواد علي مريدها
ولا فيها ملامح اي ثبات
سماوات احلام كنت بأولها
وانا معرفش الدافع ايه
وكل ما اقولي ولا ابرر
الاقيني بروحي جوا جروحي
وجراح الناس في الجرح اهات
سماوات اضغاث
كان جزء من الاحلام يتحقق
وكانت تطرح نور ومحبة
وتعمل شمس وقمره جداد
وتغزل م الانوار روايات
سماوات اغراب ولا لون ولا شكل
ولا تنفع اصلا سقف لحد
لكن كانت بالنسبالهم
عاليه وفوق راس الكل
والواحد فيهم سقفه سما
فمش فارقه معاه حكايات
سماوات اجناس
والناس حراس
صاحيين ابراج
عقرب وميزان
جدي وسرطان
نايمن احلام
رؤيه وتخاريف
وحزام مفتول م اليف
مبلول من عرق الضهر
ساند اوجاعهم ليملوا
فيملوا للقيل والقال
ويروحوا لسكه اخراها خراب
ويجيلك واحد متفزلك
م العلم دماغة حتتفرتك
والفكر شمال
ويزن في راسهم فيقولوا
نجيب عراف.
نجيب..علام
دا عنده علم وليه علامات
سماوات اجراس
بتدق الكون بحديده قديمه
ومصديه كمان ع الاخر
بيان مع دقتها نشاز
لو ان الخلق تتوب وتآمن
تتبدل ليهم في الاحلام بسمات
سماوات عفاريف
وسنين اوهام
حورات وكلام
ريشه ومنقار
وبخور بالزيت الحار
زيت مصنوع في المغرب
تدهن منه وتصبح نايم
في تبات ونبات
خليك نايم
يمكن في الاحلام الحلوه
تلاقي يقين انك تصحي
وتبص لروحك في السماوات
