موقع إخبارى شامل

سعيد شحاتة : مصر مش بلد الشاعر الواحد ولا ينفع تكون كده

اختزال شعر العامية في بعض الظواهر والأسماء شيء كارثي ولا ينم إلا على ضيق أفق لا يليق بحضارة عظيمة زي الحضارة المصرية…. مصر مش بلد الشاعر الواحد ولا ينفع تكون كده… مصر مليانة خير…. وناس عارفة هي بتعمل إيه…
تابعوا برنامج العامية في معرض الكتاب وشوفوا العتاولة اللي بجد…. العامية على أرض الواقع… عامية الخيال الخصب والحياة المليانة بالتفاصيل…
الظاهرة ممكن يكون عندها اللي ما نقدرش ننكره عليها… لكن تعالوا نشوف الحقيقي… اللي عنده كتير قوي… وقادر يضيف للحياة قصيدة جديدة بجد…
شكرًا للهيئة المصرية العامة للكتاب على إتاحة الفرصة… وشكرًا لكل شاعر قبل الدعوة… شكرًا للجنة الثقافية ولجنة التنظيم… ولكل قلب نبيل واقف جنبنا وبيساندنا ولو بكلمة كويسة…
دا برنامج فيه حوالي ٢٥٠ شاعر وشاعرة عامية… على مدار ١٢ يوم إن شاء الله… كنا نتمنى نضيف كل شعراء مصر اللي بجد هنا… لكن المساحة الزمنية والوقت ما يسمحوش نضيف أكتر من كده بجد… ودا عدد كتير جدًّا على برنامج… لكن مش كتير على العامية المصرية… ولا على شعرائها ولا على الشعر البدوي ولا على فن النميم…
العامية بخير ومصر ولادة… وكل كلمة الشعرا قالوها وسام على صدر كل منظم ومهتم… وقبولكم الدعوة شرف كبير لنا كلنا… تنوروا المعرض… دا مكانكم…
لكل مهتم بالفن والأدب وشعر العامية… حاول تحضر معرض الكتاب السنادي عشان تسمع شعر على مسارح الفنون بعيدًا… الشعر جنب المزيكا وسط الناس…
مستنيينك على مسرح الفنون ١ بجوار بلازا ١ من الساعة ٣ للساعة ٥…. وعلى مسرح الفنون ٢ بجوار بلازا ٢ من الساعة ٤ للساعة ٦… وماراثون جديد لشعراء العامية المصرية 💐
إن شاء الله هنشارك برنامج كل يوم بمواعيده هنا…
قد يهمك أيضا

التعليقات مغلقة.