موقع إخبارى شامل

حرف آيل للسقوط | شعر : وليد المصري

حرف آيل للسقوط | شعر : وليد المصري
حروف بتكتم سر جوانا
فى الروح بتهزم النسيان
وحروف بتكتب كل أوجاعنا
جوه الكتاب تتقل البنيان
بين السطور مخنوقه خطاوينا
ومشيلانه كتير أوجاع وأحزان
فى ساعة صفا بنبوح بالسر
وندوب معانى الود والكتمان
مابين العشق وحلاوة العمر
بيخرج منا ويشق اللسان
كاس الحياه بنشربه مر
يطلع كطلقة رصاص للموت
بتصيب الكل بالخرس وتمر
جوه القلوب فى عز السكوت
قنبله وموقوته بتصدع فى الودان
بتزود الشرخ القديم وتفوت
تهد الإراده فى جدور الكيان
سنين التحدى بتقل وتموت
الضحكه البريئه جواك يا إنسان
تبدل وشوش الناس فى البيوت
ونتوه مابين فلان وعلان
والناتج حرف آيل للسقوط
فى عالم كله عادم ودخان
وخلق بتسعى شقيانه فى الملكوت
وإذاعه كل حبه تذيع بيان
كام واحد إستشهد النهارده
كام واحد نجا م الموت
وينزف القلم بالحبر ع الورق
أوقات بيكتبنا وكتير مايكتبناش
وبرغم المرار اللي جوه الحلق
بيسجل حضور وغياب ومابينساش
يصور معالم وجوه الخلق
وياخد الكادر بسرعه ومايستناش
مشاهد كتير فى الحياه تبهر
والشقى مكتوب ع الجبين مابيسبناش
ع الرصيف واقفين وبيصبنا القلق
مستنيين المصير إللى لسه مجاش
وف لحظه بنودع المحطه وننطلق
فى قطر السبنسه القشاش
وسط الوجع والهموم بنغرق
والعمر بيعدى ويروح بلاش
فى سكة سفر ودموع وذكريات
كتب العلم والأدب بتتحرق
والطيبه والإنسانيه بقت شعارات
أحلام بنحلمها وطموحنا بيتسرق
مابين الثوانى والدقايق والساعات
دابت نفوس البشر من الحيا
وماتت معانى النخوه فى كل الحاجات
اتحولت حياتهم لجثث واشلاء
وإتشكلت بالروح والدم المفردات
الصمود فى المعركه ثمة الأقوياء
والضماير بتقتل وتعمل غزوات
نفوس بتتلحق بفرق إخلاء
وقلوب بتموت فى حب الذات
كل الحروف بيكتبها النصيب والقدر
سطور ع الورق وإحنا الأداه
بنحزن ونفرح ونحس بالخطر
وكله مكتوب بفضل الله

***

قد يهمك أيضا

الشاعرة العراقية وفاء عبد الرزاق تصدر ديوانها الثاني كلب فانوسشعر شعبي عراقي وننشر قصيدة من الديوان

مدثر الخياط يكتب عن تفاصيل الامسية الشعرية بنادي القوصية اللقاء الأسبوعى

سلمي | شعر : محمد حشمت من ديوان عام لله

التعليقات مغلقة.