إلى حبيبي محمد مغاوري.. من شعر العامية المصرية للشاعر البرمبالي
—
كان نفسه يطبطب يوم علي نفسه
ويمسح دمعة تملي بتملي عنيه
معلهش
الصبر علي المكتوب ــــ
مكتوب ــــ
ويطمن نفسه بأن الدنيا ف يوم ح تصالحوا
فيصبح يوم محبوب
واكمن النص الفنان منه بيهرب منه ساعات
ويعيش بالنص التاني المعجون بالطين
فيلخبط ف المسافات .
…………
الحلم ..
…….
حقك تحلم
من حقي كمان احلم ذيك
من حقي اعيش لو مرة ف حلم
وأصدق نفسي كمان ذيك
واحلف لك اني اللي انا عشته
كان حق وعلم
ايه يعني الدنيا يا عم الحج
غير بس طريق عارفين آخره
ولا نعرف غير الليل لو هج
ولا نعرف امتي ه يستاخروا
الحلم يا صاحبي مهوش هربان
ولا هو رياحة عقل وبس
الحلم خليط من روح وحنان
او امنيات وحاجات تتحس
انا بحلم مش علشاني وبس
انا بحلم برضه عشان الناس
واقدر اعمل م الحلم غيطان خضرة
وازرعها ورود وعيون سمرة
لكن يا خسارة الحلم ساعات بخلص
وانا واقف لسه ف نص الحلم
شايفك يا صديق العمر هناك جنبي
نفس الخطوات وبنفس العزم اللي في قلبي
ما شبين لطريق عارفين او مش عارفين آخرة
لكن ما شيين
يمكن ميكونش الحلم بيحلم بيه غيرنا
والكل بيحلم حلم يدوب معمول بمقاسه
مين فينا ف لحظه استغبي وكان داسه
مين فينا استني لاخر لحظه وقام باسه ؟؟؟
……….
(كان نفسه )
كان نفسه يكون عصفور بيطير
ويلقَّط رزقه ف أرض الله
مش خايف من صياد ولا ليل
والدنيا براح مش فارقه معاه
وف أخر اليوم ب ينام ف العش
من غير تزويق ولا زيف ولا غش
ويغير عشه بنفسه ساعات
ويزقزق ف الفجريه ساعات
كان نفسه يعيش مبسوط
وينام مبسوط ويعيش ف تبات
لكن ف نهاية المشوار خالص
خالص خالص خالص مات
ف نهاية المشوار مات.
………..
الشاعر البرمبالي
اقرأ المزيد:
مش لاقي الغنوه.. قصيدة بالعامية المصرية للشاعر: أشرف الشناوي