موقع إخبارى شامل

الوصية .. شعر / عبد الهادي شعراوي

الوصية .. شعر / عبد الهادي شعراوي
……
لما أموت ..
إوعوا تنسوا تدعوا ليا
دا إللى باقي .. دا الهدية
إللى هَتوسع في قبري
و إللى هَتفرح عينيه
والوصية لك يا إبنى
قبل ما الرب يحاسبني
فوت علي الأشواك وابني
صرح مجد وتبقي صامد
زي جدك يا إبني حامد
عاش كريم للرب حامد
للوطن كان عشقه جامد
واد يا حامد ..
خلى بالك من عيونك
سيد الغالى وشروق
خلى بالك م الكبيرة
ستك الغالية أم أبوك
إرسم البسمة فى عينيها
راعى ربك إللى فوق
شيل عن أمك بوس إيديها
اوعى تاكل يوم حقوق
او تغمض عين وتنسى
مهما للألام تدوق
شيل حمولك مهما كانت
دنيا فانية مهما طالت
لو عليك ب الهم مالت
ادعى ربك اللى فوق
واد ياحامد ..
اوعى حد عليا يبكي
قول لكل الناس وإحكي
إن أبويا قلبه طيب
عمره ما زعل قُريب
وإني كنت كتير بسامح
لأجل عارف كله رايح
وإنى عمرى ماخنت حد
ولا حتى نقضت عهد
عشت عمرى بالمحبة
عمرى ماتاخرت حبه
انى اطبطب او اعين
كنت حارس لك أمين
كنت حضن وكنت عين
واد ياحامد ..
قول واوعى تخشى قول
بس حافظ ع الأصول
الأصول مش بس قولك
الأصول بيتك ونولك
اوعى تتحكم ظنونك
أو تسيب دمع ف عيونك
واد ياحامد ..
إشفى وجعك بالسلام
لملم الأحزان قوام
قلبك أخضر لسه خام
خلى عينك ع العلام
صلى صوم مد إيدك
للصغير والكبير
إنت شايل إسم سيدك
إللى حبوه الكتير
إللى عاش نص عمره
يحمى مصر والحدود
إللى شارك فى المعارك
ذل ياما كتير يهود
واد ياحامد ..
خلى بالك من دروسك
إوعى حد يوم يدوسك
خلى صفك فى الأمام
مهما كان مكان جلوسك
خد بإيد سيد وشوشو
اوعى عنهم يوم تنام
مهما كان الهم حوشه
وإرسم الفرحة بحنان
واد ياحامد ..
خلى كل بعيد قريب
بالوداعة مش كَديب
او تقرب يوم لعيب
خلى ريحتك تبقى طيب
اوعى تنسانى يا حامد
اوعى قلبك يبقى جامد
حب وطنك زى دينك
اوعى تنسى دى الوصية
خلى رب الكون معينك
قد تكون صورة لـ ‏‏‏شخص أو أكثر‏، ‏لحية‏‏ و‏نظارة‏‏

التعليقات مغلقة.