مبدعو مصر
*******
عــوزاني أصبــر ؟
اديني صابــر
ولا صبري ما كفكيش
ولا اشتريلك صبر تاني
يمكن لبكرة منلاقيش
يمكن هايغلى زي قوتنا
زي الدولار ما بيستحيش
زي اللي بيمصوا في دمانا
واللي بيتاجروا في هوانا
ليه شيفانا حزانا
وأنتي ساكتة
مابتسأليش
يا مدوخاني أول وتاني
يا معشماني بالأماني
أنا فى حماكي نفسي أعيش
او رجعيني لبراح زمان
تحت ابراج الحمام
وسط الغطان
جنب السواقي اللي دايرة
و النوارج ام صوت زي الآذان
ارجع ل حارة الطيبين
في الفرح أفرح معاهم
في الحزن ينزل دمعنا من كل عين
نجري ونلعب فى الساحات
الجدة سبقانا بدعاها
والجد بيحكيلنا حكايات
بيانولة العم أمين لما ينادي
نخش جوا الأمنيات
وبــ نص عين
نشوف انا وانتي أحلام البنات
الشاطر حسن في الف ليلة
ودياب ابن غانم ويا الزناتي
في تغـريبـة العهد اللي فات
وسط الحان شاعر ربابة شمّر دراعه
ساعة سمر
والناي يصحى الذكريات
الخير كتير مالي المجور
تعلا الغناوي ويا الرحايا لما تدور
الفرن حامي ف كل بيت
حصيرة قش تلمنا
خصامنا دايب في حبنا
المية شهد فى كل زيــر
و الشدة تجمع شملنا
بس خلاص زمن و فات
يا معيشاني على الفُتـات
بتعشميني تاني ليه
وتقولي أصبر
حاضر راح أصبر
بس قوليلي ازاي أعيش
في زمن مفهشي معجزات
