منوعات
احدث ماكتب نبيل مصيلحي: إلى أحمد نبيل..العين إللي باشوف بيها..!! بمناسبة عيد ميلاده
إلى أحمد نبيل..العين إللي باشوف بيها..!!
بمناسبة عيد ميلاده
—
للنن الساكن في عيوني
والخضره الباقيه في غيط القلب
أحمد يا ابني..
العمر بيجري ويفلت مني
ما اعرفش في علم الغيب أد ايه
الباقي اللي هاكون وياكو
أنا صبحي مفتح بيك واخواتك
ما انتوا الماليين أيامي حياه
ساندين في الحيل اللي خلاص هيسلم للشيبه
والله انا كنت هقولك عقبال ال ١٥٠ سنه واسكت
معرفش الكلمه بتجري على لساني وتخرج
من غصبن عني..
أنا بيكم مهما أتعب مرتاح
أنا بيكم عايش عمري صباح
أحمد يا ابني..
والله يا حبة عين قلبى
كفايه عليا اشوفك داخل طالع بتشقر على أمك
يا الطيب..كل الناس حباك
باسمع عنك كل الخير
إيدك في ايدين الغير
ما هو أصلك بتحب الله
وتحب يكون دايما وياك
والله داعيلك من قلبي في مسايا وصبحي
يسترها معاك دنيا وآخره
يا أول فرحتي في الدنيا
خليك زي ما يبقى إلهك عايزك في النور
هتعيش مستور والخير حواليك
بالله عليك لو فوت الدنيا .. مشيت
حط اخواتك في عينيك
إنت ابوهم بعدي زي عيالك خليهم حواليك
والله ما أنا قاصد أبكيك في ميلادك
اهي جت كده وخلاص
كل عام وانت بخير
—
نبيل مصيلحي
