متابعاتثقافة و أدب

أنا عربى / شعر: محمد عبد القوى حسن

أنا عربى

شعر : محمد عبد القوى حسن

عضو اتحاد كتاب مصر

* * *

انا عربى

واسمى بيتنطق عربى

وصورتى بتحكى عن اصلى

وعنوانى ف حواريكى

ودمى دا .. رهين ليكى

ميلادى ف ارض اجدادى

وزادى وكل زوادى

يقول عربى

وتوبى من زمان ناسجة

بايد عربى

ومش قاعد                                             كلمات/محمد عبد القوى حسن

لكن داير

الف فى فضا الكون اللى مش عاوز يدلينى

وفية اشياء ماهيش داخلة

ف وسط الراس

ومن جنبى مفيش احساس

واصرخ ياملوك الارض

لية نسيتم العربى

تاريخى صار تاريخ تانى

وعايز اعرف

وعايز افهم

اصوم وافطر على هدفى

وفين هدفى ؟

ياريت هدفى يصوب

ياريت عقلى يتوب

ياريت ننسى الذنوب

ياريت الناس تلاقينا

تقول مبروك

ياريت نرجع لماضينا

بعزم قلوب

ياريت وياريت

ومع كلن انا عايش

كمثل الناس ماهى عايشة

ومع كلن بشوف اشياء تصبرنى

تقولى شوف

ابص بخوف

مع رعشة ضمير جوايا واخدانى

الاقى اهلى وجيرانى بقوم تانى

تروح نفسى دى شايلانى وجايبانى وحاطانى

ف وسط العالم الأول

ف وسط العالم التانى

واسأل فين                                                  كلمات/محمد عبد القوى حسن

واحنا مين ؟

ولية ياناس نكون تالت؟         

تزيد مشكلتى فى التعقيد

وانا ببحث عن العربى

من ساعة خليفة الله

لحد العالم التالت

وعندى حلول

وشىء معقول

وانادى واقول

خليفة الحق لو ترجع

معاها ياناس نكون تانى

شهادات الميلاد تسقط

جوازات السفر تسقط

بطاقاتى هوياتى

وتسقط كل شهاداتى

وامشى بس بشهادة

ماهيش محتاجة لزيادة

اصيح واقول انا عربى

وكل الناس تقول عربى

وكل الناس تكون عربى

انا عربى

ياريت تقولوها بالعربى

 

قصيدة اخرى للشاعر: ( طرحة امانيك .. شعر : محمد عبد القوى حسن  )

 

الوسوم

أسماء مصطفى

كاتبة صحفية تدرس اللغة العربية لها مجموعة من المقالات الفنية والثقافية المختلفة.. عضو جمعية مبدعى مصر ..

اترك تعليقاً

لن يتم نشر عنوان بريدك الإلكتروني.

إغلاق