مين اللي مات؟؟ (اللي ألِّف ما ماتش) شعر : محمد إسماعيل

ربما تحتوي الصورة على: ‏شخص واحد‏

مين اللي مات؟؟
(اللي ألِّف ما ماتش)
ــــــــــــــــــــــــــــــ
مين اللى مات؟؟
ما تبطلوا إشاعات!!
كل الحكاية إنه راح يجدد الباسبور
وقف لآخر النهار
وما جاش عليه الدور
وهو راجع افتكر
إنه.. “ممنوع من السفر”
وقلبه كان مشتاق قوى للشيخ إمام
وملجأ الأيتام
وطه حسين وشوقى والعقاد
وبيرم التونسى وجاهين
و لمعة خجل في عيون فؤاد حداد
ولَمَّة العشاق في سجن القلعة
وكان راسمهم قصايد
وكان فاكرهم نفر نفر
وقلبه كان مشتاق
لحوش قَدَم وبولاق
وأسامة أنور عكاشة ونجيب محفوظ
وجمال حمدان والشيخ محمد رفعت
وشادى عبد السلام
والبندقية اللي صَدَّت فِ إيدين عساكر القُشلاق
و ف زحمة الشوارع
وضحكة الشهداء
لمعت كتير أسماء
ساعتها بس افتكر
إن السفر للسما
ومقابلة الأحباب
مش محتاجين جوازات
ولا لِسْتِة “ممنوعات”
ولا طابور ولا دور
دول محتاجين يدوب جناحين
ورعشة قلب
وغمضة عين
قام قطَّع الباسبور
وخَبَطْ بِرِجلُه الأرض بالحنيَّة
وخطَّى “سور ورا سور”
وزمانه عند الباب
بيوزع السلامات
مين اللى مات؟؟
ما تبطلوا إشاعات!!
………………..
محمد إسماعيل



أحدث المقالات