مسحراتى ( مبدعو مصر ) يكتبها لكم / محمد عبد القوى حسن / الحلقه الرابعه ( المتغطيه تكسر المحرات)

 

وانا شغلتى مسحراتى

احكى حكاياتى

والف دروب ودروب

ادعى اللهى

يقبل صيامكم قيامكم

ويفك كل الكروب

ناس كانوا قبلى

قالوا ف الامثال

المتغطيه تكسر المحرات

فاحرت عدل ياجميل

وخلى قولك اصيل

واتحرى كل الصدق

ف المعنى والقوله

الفوله تطعم بلد

وقد الرضا ياولد

وخلاص اهو ولى ومشى

عصر الضلال والفسق

ومافيش اوان للخوف

الكل عنده شوف

يقدر يشوف السكك

ويكشف الباطل

من الضلالات

بشوات زمان انتهو

والحر ابن الحر مابيضل

دايما صريح ف المعنى

ولكل وقت قوله

ولكل راجل عوزه

ولكل صوم سحور

واذان ومدفع فطور

وقبل ما يدخل عليك الوقت ياحسان

اصحى بقى من النوم

وصحى فاطمه وعلى

ونبيويه وكل الجيران

رمضاااااان كريم

 

 



أحدث المقالات