غزال ف قلب المحال / قصيدة بالعامية ا مجلة ( مبدعو مصر )ا / شعر : جيهان لطفى ابراهيم

لو خفت من عتمتك….
و سرجت من دموعك ضي
و كسرت من غير ما تحس فانوس في شوارع قلبك
و رميت ضلوعك تحت مطرقة الحزن
و صحيت على صرختك عيون الحي
حي
على همتك
على رغبة النسيان
و حلم غلبان الغلبان
حي
على طريق قفلته بغشاوة
شغل من غمضة عينك منارة
مد ايدك
و حسس على ملامح طريقك
لو لحظة نزلت دمعتك على ذكر ذكرى
لو حطيت ملح الشوق على ندوب الحنين
لو بات عنادك صاحي في فرشتك
متنتظرش النور من مغيبه جاي
و لا فجر عفي من ليله يطل
حتى عقد الياسمين هيموت على ايدين الفل
قوم من غفلتك ….
قوم معاك الكل…
ورقة شجر
ضحكة قمر
مسحة جمال الدلال
غزال
شرد في قلب المحال…..

 



أحدث المقالات