رسالة إلى الوالي / شعر : صابر فرج ياسين

قصيدة بالعامية المصرية
رسالة إلى الوالي
============
وبكتبلك
برغم إني عايش فيكي
بقول يا حبيبتي وحشاني
ورغم إني ما أذنبتش
عايش فيكي دور الجاني
ورغم إني من الآلم بصرخ
بقول ولا حاجة وجعاني
وبتقولي الحياة حلوة
طب ليه وياكي بنعاني
ورغم إنك صحيح أمي
ليه يا حبيبتي هجراني
أنا إبنك .. شايل شالك وبخلصلك
ولما بيتذكر إسمك تزيد القوة في لساني
فا سامحيني راح اتكلم
ومش هقبل سكوت تاني
خلاص زمن الوجع ولىَ
وعن دوري على الهامش راح اتخلىَ
ده ظلم العيشة خد مني وما خلىَ
ياريت تبقى الأمور أحلى
واشوف فيكي أمل تاني
أنا م الوجع هنطق
ومش هاسكت أكيد تاني
******************
وإنت يا بويا يا سايبني
يا نعم الناس ونعم الأب
زمان قالوا ما يقلق اللي عنده أب
وليه أقلق وانا عندي فالق النوى والحب
أبويه مني ما تقرب
بلاش منك أنا أتغرب
وليه لما بقول فينك
تقول إنك هنا قريب
أنا شايفك صحيح لكن
بقول عيني اللي بتغرب
ورغم انك .. بتبني ف الخلا مساكن
لكن أنا إبنك وتعذرني
فين منك أنا ساكن
بتبني لغيري وأنا شايف
تدفيهم وأنا خايف
صِبرت كتير وأنا عارف
كلامك كله مترتب
فلازم .. أبقى متأدب

وأنا بكتب كلام وأشكي
ولمين غيرك حبيب أحكي
ولما إبني من الوجع يشكي
لمين هنروح لمين نبكي
ياريت مني ما تزعلشي
أنا إبنك وما يهونشي
أبوحلك باللى جوايا
ألاقي لأ .. كدة فى وشي
وسايبني .. مع الظروف بمشي
*************
أنا إبنك .. .. بدعيلك وبتألم
نفسي بجد ألاقي دوايا
نفسي حقيقي أتعلم
وكان نفسي من الشقي أسلم
يا بويا بس واسمحلى
نفسي .. أبطل أتألم
وإمتي هتحلا لي العيشة
وأشوفلي عشة ومعيشة
وبدال ما الإيجار مكسور
ووصل الغاز ووصل النور
واعمل ايه وأنا براتب بإيد مبتور
طب إلحق حتى وساويهم .. وأكون مشكور
ويمكن ألقي يوم أسكن
ويمكن حالي يتبدل ..
خلاص بحلم يكون أحسن
ويمكن أموت وأطمن
بإن إبني لقي مسكن
ومش ها يعيش في يوم زيي
تايه وباله كدة .. معكنن
***
وفي الآخر أنا إبنك
ولوتسمح راح أكتبلك
رسالة حب وأحلفلك
بحب أمي كما بحبك
وماتنسى أنا الجندي على دربك
فداكم دمي ولايمكن فى يوم أهرب

وأخيرا
رسالة لحضرة الوالي
كاتبها وراسي في العالي
ولآ عمري ها قول مالي
ولو يا والي زعلتك
أوجه شكوتي لغيرك
وغيرك هو رب الكون
كريم وفي السما عالي
فَعُذرا .. سيدي الوالي
إمضاء / إبنك ولسة بيعاني



أحدث المقالات