موجوع / شعر : سيدفاروق احمد / مجلة ( مبدعو مصر ) ملف ادباء ديروط


موجوع
والوحدة دموع بتسرسب من عمرك
والصحبه شموع وطافيهاالريح
مجاريح ..بتواسوا ف بعض
وفرض عليك
يرحل كل رفاقتك من حواليك
وعنيك بتسح ف دم
وهم يزيد ويفيض
هم مايتلم
متلتم حظك بوشاح
أسود وحزين
صابر
لكن ناسك مش صابرين
والعمربيجرى ويرمح منك
وإكمنك
مبصر
وسط العميان
تلاقيك غلبان مش عارف توصف معنى الشوف!
ساعة بياجيك الخوف..ماتخافش!
وإزاى
عايش للأن
إنسان
والكل وحوش
ماتحوش الوش الطيب
وإلبسلك وش من المغشوش
علشان الناس
بتحب الغش
الناس ..بتحب تعٙيْب
وتغيب كل الطيب
خليك مجنون وسط العاقلين
وعبيط وحويط وسط التعابين
هاتعيش وياهم جوه الجحر
ولاحدش منهم يقدر يئذيك!
……….
وبتجرى وترمح ياولِيدِى ورا سراب كداب!
والدنيا تشيلك وتحطك ،وتُسك الباب!
الموت عا يرٙمِح ورا منك،والعمرحساب
مكتوب ومسطر على كفك فرقة لاحباب
منقوش على وشك وجبينك:ضمن الأغراب
والحزن بينحت ف ملامحك وأدى شعرك شاب
طب قولى إزاى: لساك عايش ما طاواكش غياب؟
طب قولى إزاى:لساك متهاب؟
#سيد_فاروق



أحدث المقالات