الله يسامحك : كلمات مرفت جابر / مجلة ( مبدعو مصر )

 

الله يسامحك
كلمات مرفت جابر


…………..
لمّا تلقى النوّه هاجمه
والورود من غير عبيرها
أو تشوف عصافير ف حيره
والمطر حدد مصيرها
واللا أم ضناها سابها
فجأه واختار حد غيرها
واللا تلمح سندريلا
ضايعه من أحضان أميرها
إفتكر قلبي الحنيّن
لمّا شاف قلبك ف حيره
فك من شعره الضفيره
راح وقابلك بابتسامه
وامّا ساب الكون عشانك
حتى وما خافش الملامه
وافتكر لحظة ما شوفتك

رامي كل عينيك عليها
رغم كل خطاوي ليها
فيها ميت سكة ندامه
وامّا بحر الغيره خدني
قومت أمشي
سيبتلي الدمعات ف رمشي
سايبه ع الخدين علامه
سيبتني ف سكّة رجوعي
ماشيه ضهر القلب محني
حتى من غير ما تصالحني
أو تقوللي مع السلامه
من قساوتك شوفت ياما
من طيابتي شوفت أكتر
كل مرّه باقول سامحتك
ألقى منّك حاجه أكبر
دمع عيني يزيد زياده

وانت من دمعاتي تسكر
لمّا شهد الحب منّك
إشتكى بطعمه الممرر
سيبت نور الحب يصغر
لمّا أصبح ضي خافت
واما روح الحب خافت
قلبي منّك رح بعيد
دا ف هواك جبلين جليد
والغرام دافي بطبيعته
سيبلي قلب سنين جرحته
وانت روح ..
الله يسامحك



أحدث المقالات