واحشنى ياابا / شعر : سحر زهران

من ديوان

شريان الحياه

…………………….

فاكرة يوم زي النهاردة
من بدري تصحَى و تصحِّي فينا
و كل واحد بدلعه تنده
أنا لسة سامعة صوتك علينا
فكرة فراقك كانت بعيدة
حتى أما تتعب بنقول بسيطة
دلوقتي يشفَى وعكة و تعدي
أنا بعد منك يابا وحيدة
باحضن هدومك و أشم ريحتك
بدموعي عايشة أنا جوة صورتك
باخد و بأدي عيني في عينيك
و كلامي ليك و استنى ردك
وَحَشِتني يابا همسة نصيحتك
وحشنى حضنك قولة سامحتِك
حتى الحيطان سالت دموعها
مكان صلاتك شايفاك راكعها
خوفك عليا لو غبت حبة
لهفة عيونك شايلة المحبة
ياما راضيتني و رضاك هدية
مين يدعي ليا يا ابويا بعدك
خلاص مفيش أيام هنية
مين راح يداوي
جرحي أما بازعل
و لو تعبت
يسهر ما يغفل
أعمل لمين قهوة بزيادة
ببسمة يشرب و يقولي تسلم
دي اللحظة جنبه كانت سعادة
و حتى “كانت” كلمة بتألم
يا ابويا رحت و أنا الصبية
لا شفت فرحي و فرحت بيا
أخلي مين بعدك وكيلي
و مين يوصي العريس عليا
و يكون لي ضهر
معاه ف مشاكلي
يعمل حسابك و يصونني دايما
ما انت يا ابويا سندي و أهلي
أنا عارفة إنه مكتوب علينا
حقيقة واضحة و لا بإيدينا



أحدث المقالات