” جرعة زهايمر ” / شعر : شريف صبره

مبقتش عايز قهوة ولا فيروز
مبقتش عايز حتي مزيكا
انا بس بسال لو يجوز يعني
مبقاش فـ عينكم صنف انتيكا .

لو كنت اقدر اجيب جرعة زهايمر بس
انا كنت هبقي تمام
وهنام بدون ازعاج او اي حد يحس
لا مخده تشرب هم فيه املاح
ولا رف يزعل عـ اللي سابه و راح
اعمل حاجات و انساها كل صباح

وكاني برجع اعيش نفس الحياه تاني
لكن بدون ذكري محفوره جوا مكان
او املي في بكرا ويصبني بالخذلان
او حبي في انسان مسيره هيودع
او اعيش ع جملة والله بتدمع

_ امتي اللي راح يرجع _

انا نفسي بس تجيلي فوبيا مـ الحنين و القُرب

يمكن اشوف وقتها .. كل الحبايب غُرب

مبقتش عايز غير نعمة النسيان
انسي اللي كان .. انسي المكان و الدار
انسي اللي مشيوا واحنا مش حاسيين
وانسي اللي حلفوا بانهم باقيين
وسابونا قيد الانتظار

وانسي حكاية طير .. هو اللي كان مني
هو اللي كملني .. هو اللي أمني
على السكة والمشوار
فجاه الزمان واهو دار ..
لم اللي باقي و طار .. وتركلي ليه العش
طب تعمل ايه معلش .. والله ما بتنفع

لا هي خفت الاعباء ..ولا كنت دوا للداء
في ناس ماتوا فـ قلبنا مع انهم احياء

يا عالم الشعراء ..

انا مستقيل مـ الشعر .. يمكن مانيش منكم
لكني بسمعلكم … وبحس بالمعاناه

_ داخلت ليه في سباق لما الهدف قده تاه _

يا كل خلق الله ..

تعبت مـ التاليف و الكدب والاسفاف
اصبحت فعلا اخاف اني اكون شاعر
وانزل بحور الشعر
والاقي الشريط بيكر
والاقي السنين بتمر
في كتابة الاوجاع .. والسرد و التشبيه
مشوار بلا اهداف فلابد اني انهيه

وارجع اعيش عادي بدون حواس المس
او ذكريات الأمس او زحمة الكراكيب

لو كنت اقدر اجيب جرعة زهايمر بس
انا كنت هبقي تمام
وهنام بدون ازعاج او اي حد يحس



أحدث المقالات