افراح مبدعو مصر / مبروك للشاعر الكبير رضا ابو الغيط زفاف كريمته

اسرة تحرير مجلة ( مبدعو مصر )

تتقدم بالتهنئه للشاعر الكبير / رضا ابو الغيط بمناسبة زفاف كريمته

بارك الله لكما .. وبارك عليكما .. وجمع بينكما فى خير .. وعلى خير

محمد عبد القوى حسن

يشرفنا زيارتكم لمجلة مبدعو مصر على الفيس بوك اضغط هنا

 

 

معقولة سعاد
هتفوت الدار
وتفوت الحضن
اللي ما ضمش
غير ست الدار
وارجع من تاني
لزماني 
القاسي الغدار
اترجي عينيه تطرح لينا
م الشمس نهار
ويفوت علي قلبي الصبحيه
وف كفه هزار
ويقول يا كبير
هتروح الشغل وتترافع
وللا أفكارك راح تولد 
لينا الأشعار
وتخط بألمك أغنيه
يسمعها الدمع اللي ف عيني
يملا الأنهار
معقولة سعاد
هتفوت الدار
وتخدها إيديا تسلمها
للواد بدار
واستني أشوفها بقطاره
بعيون محتاجه لنظاره
بعد ما كات ليا الأموره
خطوه ف مشوار
وخيوط الشمس اللي بتلضم 
م الفجر نهار
والورد الطارح ف عيوني
أحلي الأزهار
معقوله سعاد كبرت واحنا
لسانا بنحبي علي رُكبنا
علشان ما تقول وتفرحنا
انا عايزه أمبو
معقوله الواد
كان جايب ابوه
علشان ما يخدها ويحرمنا
من نور الدار
ويفرح داره بأوصافها
ليل ويا نهار
ويجيب النونو اللي يقول له
بابا بدار
ويفرح جده اللي بيحلم
يطرح له الفرع المتربي
أجمالها ثمار
وأنا قلت خلاص اللي ف قلبي
من غير ما أنافق وللا اخبي
مبروك ….يا سعاد
مبروك……… بدار
مستني النونو اللي يقول لي
انا عاوز أمبو
واعمله حصان
وان حكمت اعمل له حمار
وألف وأطوف
ألعب وياه وأنسي سنيني
اللي ملاها الخوف
وأدي له اللقمه اللي ف ايدى
وف قلب الجوف
ويكون عكاز يسند أمه
ودراع لأبوه
ويكون الشمس اللي تدفي
أركان الدار
ويحب بلاده ويحرسها
فوق خط النار
ويكون القلعه اللي تصونها
كده م الأشرار

( بابا / رضا ابو الغيط )

 

 

 

 

 

 

 

 

 

 

 

 

 

 

 

 

 

 

 

 

 

 



أحدث المقالات