سعيد حجاج يكتب لمبدعو مصر قصيده بالعاميه جديده

انا كل سبتمبر
بيغتال الألم روحى
ويحل ف عروقى الوجع
وباشوفنى شعلة نار
مايطفنيش الزمن
وخارج م الحريق لسة
وباشوف بهائى الميرغنى
بيربى نعجتين ف الجنه
ويغزل بصوفهم براقع
وبيغسل الكواليس
ويخرج ف عرض جديد
مع السلامة ياصاحبى
مع السلامة ياغاندى
يافيلسوف هندى
وقلبك جرس انذار
امانة عليك تفتكرنى وانت
هناك ف الموت
او وانت ف الملكوت
امانة عليك تبوس لى
صالح سعد م الخدين
وتسلم لى بحرارة على
صاحبى محسن مصيلحى
وحازم شحاتة وحسن
ماتنساش تقول لعلاء
اننا رايحين له اكيد
ومسيرنا نتعاتب على مرار الغياب
اللى خد من روحنا ولا ادناش
حاجة
غير حبة الاسئلة .
امانة عليك يافيلسوف
تبلغ نزار سمك
اننا مشتاقين له موت
نفرغ حزننا على كف احلامه
وبلغ كل خلاننا
ان الزمن لو كان
يقدر ينسينا
كان من زمان
نسى
ولا كانش يسيب فى الروح
كام جرح غاير لسه
مالهمش حتى علاج
غير اننا نطلع
نرتاح فى حضن
الله.
ونلاقى كمان فرصة
نكمل الاحلام .

 

يشرفنا زيارتكم لمجلة مبدعو مصر على الفيس بوك اضغط هنا



أحدث المقالات