فريسكي / قصيدة بالعاميه للشاعر :محمد الجوايدي

  هذا شاعر جيد ونقدمه من خلال مجلة مبدعو مصر للساحه الادبيه لاول مره والمجله تحتفى بنصه وتتمنى له مستقبل رائع فى شعر العاميه المصريه قدم نصه للنشر الشاعر الجميل وائل سعيد واحى هذه الروح الجميله بين شعراء هذا الجيل الجديد فهم يفرحون لبعضهم البعض وهذا شىء يسعدنى كثيرا وانا سعيد بمهما 

فريسكي

للشاعر :محمد الجوايدي

مابين اربع حيطان وكمان وصوت الناي وتنهيده ومج الشاي
مابين كُنا وبين دلوقت وبين صدقت ولا اشتاقت بعدنا امتي وليه وازاي
هعيش بعدك
وهسهر ليلي انا في بُعدك
وكيف هكتب علي وعدك
واغازل مين
وانا في العشق مش شاطر وخابت زرعتي في بنتي
مابين الماضي والحاضر وبين الشط وسفينتي
حاجات مش ظاهره فـ الكادر لكن بان انها انتي
مدينتي الخالية مالسكان
مفيش إنسان هيستحمل يعيش هربان من الذكري
ويهرب فين ومتحاوط علي الشطين وانتي المرسي والفكره وسُهد الليل
مفيش تحليل لفكرة انه كان ماضي وعدي وفات
مفيش إثبات يمد الروح بإنك بكره مش جاية
وإن إيديكي مش ماسكه في عز البرد في ايديا
يافرحه وكات معدية بسرعة تعدي الفين ميل
هشوفها إزاي وأنا راكب فلوكه صغيره في النيل
دا حتي الحيل ضعف واتهد
فـ هستحمل مرار بعدك وبعدك مش هميل علي حد
ياأول حد في الصحرا بيقسم شهقة المدبوح
بخنجر عشق مولاته
وبيحول صدي صوته أنين لسنين مابتعديش
فيرجع تاني لسكوته
حياته الواقفه مابتمشيش رفضت اني اعيش دونك ودونك كنت كالميت
بعيط بس من جوه ومن برايا لازم أعيش
بشوفك جيش في وسط الناس ووسط العزوه واللمه
بشوفك جمع مالحراس بتحضن فرحتي لمّا
تزيد الدنيا في الغمه وفي الأوجاع
بشوفك حد كنت شارية بكل سهوله سابني وباع
صراع الوحده من بعدك أشد كتير من الفرقة
ونار الهجر والخذلان
وأي كلام في أغنية وأي دموع في ليل وبراح
واي جراح معديه وأي طوفان بيتفجر من الكتمان
صحيح الفرقة بتعلم لكن والله بتألم طلوع الروح يكون أهون من إني أفارق الإدمان
ودمي إزاي هيتعالج ويرجع تاني زي ماكان
سوا بحبة جروح ونزيف
وألف خريف يمر عليا من غيرك ولو بالزيف
مهوش خارج ياأول طيف
مبتفارقيش ولا عمرك هتسليني وتبقي بعيده عن نُسكي
ياأول قعدة في فريسكي
بتشهد عاللي كان بيننا ياأكبر فرحه بتزورنا
في أول سكه نمشيها يأول بنت تمشيني
وآخر بنت ضحكتها ترد الروح وتحييني
شراييني بقت بتخاف لاتنزف وانتي ساكناها
فينزل دم يروي الأرض فتتحول جناين ورد
ويتهادوا ويتصالحوا ويتسامحوا عليه عشاق
وأنا مشتاق ومش طايل لنظرة تعيد في تكويني
كسوفك وانتي شايفاني بغنيلك ياأجمل بنت في الدنيا وإيه الدنيا من غيرك
ووعدك وانتي بتردي لو الدنيا كانت ضدي هحارب جيش انا لوحدي واسيب الدنيا واجيلك
حاجات يمكن تكون عدت وعود زي الحديد صدت
بيوت قامت مكانها بيوت مدينة بحالها واتهدت

وردت حزني لمكانه وعرت ضعفي وسط الناس
لكن والله مش ندمان عشان إنسانه حبيتها
واديتها لقلب ونبضه كان بيشف إحساسها
أنا مستغرب إنه إنداس

يشرفنا زيارتكم لمجلة مبدعو مصر على الفيس بوك اضغط هنا

اترك تعليقاً