عاشق ترابها / شعر : جمال ضاحى / السويس


بحلم ليلاتى والشراع مفرود
والجسم فوق التراب
بالعرق ممدود
والميم ماسكها
وبالسنان دايس
والصاد صاببها
والقليب مسعود
والراء ياريت الكل يفهمنى
ويشوف مكانها
بين الضلوع موجود
ويا طير بيسبح
فى سما الغاليه
وصل سلامى لاخر الجبال
وحدود
فارد شراعى والموج بيندهلى
بيقولى رزقك فى السما معدود
ياشمس بلدى ىاللى مش دافيه
شايفك بتطفى للفانوس كشاف
شايفك كليم مفرود
ومخدتين ولحاف
شايف سفينه مكسورة المجداف
يازرعة الفدان ياريحة الخضره
يامسك فايح من شقا العرقان
يامايا قومى وانفضى الهدمه
ريحة التراب
مخلوطه بالطلبات
وهناك عريس بيبيع
فى محصوله
نفسه فى سرير ودولاب
وهدمه للعريان
نفسه ف مداس يحميه
والقدم حفيان
يالفة المولودبخيوط
يالهفة الغلبان
يانخله طرحك فين
عدى المعاد ولاجاش
حتى الجريدلخضر
ليه بطل الهزازان
ياعنزة نشف الضرع
ليه مايحلبشى
لما جابولى الخبر
قالواللبن زعلان
والزرع يابس ليه
باين عليه سقعان
باين عليه مكسور
نايم حزين عطشان
يافرحه ردى الباب
والدى نايم عريان
يافرحه فينك سنين
ماتفرحى الشقيان
وفين لقمة الملهوف
فين قلة العطشان
فين فين سكة التايه
وفين خطوة العميان
فين بسمة المحزون
فين ضحكة
الصبيان
للشاعر
جمال
ضاحى
ريان
بتروجاس
السويس

اترك تعليقاً