مبدعو مصر
حديث الجمعة ..حل رائع
كنت قاعد ع القهوة دلوقتى ، وكان فى جيبى ٢٠٠ جنيه صحيحة وجنيه فكة، وجونى عيلين شحاتين واحد صغير والتانى أكبر منه ، وقالولى : حاجة لله ياحج ؟
قلتلهم : معاى جنيه واحد فكة ، مين ياخده فيكم ؟! الصغير قال: انا ياخال ،والكبير قال : انا ياخال ، المهم ادّيته للواد الصغير ، وفجأة حبكت العركة بينهم وقعدوا يضربوا فى بعض ، قلتلهم : ماتتعرّكوش ياحبيبى ، .
انا لقيتلكم حل ، قالوا : ايه هو ياحج ؟! قلتلهم : واحد يشترى بيه نُفّاخة ، والتانى يطرشقها !! وفرحوا بالخل وخدوا بعضيهم وراحوا الدكان !!
وبعد مامشوا قلت : سبحان الله ، احيانا خسارة أحدنا مكسب للآخر ، أحيانا اللى معاه حتة ارض عليها مشاكل وخدتها منه الحكومة تعملها طريق مثلا، التانى يفرح رغم انه ماستفادش حاجة من خسارة التانى ..
واللى معاه نخلة عليها مشكلة مع التانى ، ووقّعّتها الريح ، يفرح رغم انه ماخدهاش هو .. ولو صياد معاه قارب عليه مشكلة مع صياد تانى وغرق فى البحر يفرح التانى رغم انه ماخدهوش هو !!
ولو مزارع معاه مكنة رى عليها مشكلة مع مزارع تانى وسرقوها الحرامية بالليل يفرح التانى رغم انه ماخدش المكنة!! حتى اللى متزوج واحدة حلوة ومستكترها عليه واحد ، وجه فى يوم وطلّقها يفرح التانى رغم انه ماتجوّزهاش !!
هذه هى الأنانية وخبث النفس الانسانية والحقد البشرى الدفين الذى لا يصلحه صلاة ولا صيام ، لأنه من آفات القلوب التى يموت بها الانسان لو حتى كان شيخ فى جامع او قسيس فى كنيسة !!
طهروا قلوبكم قبل ان تطهروا أجسادكم ، اجعلوا ماء الوضوء يغسل صدوركم قبل وجوهكم، ازرعوا جنة فى نفوسكم حتى تدخلوا جنة الله !! كونوا أنقياء القلب قبل الجسد !!
حِبّوا لإخوانكم ما تحبونه لأنفسكم ، واذا لم نفعل كل هذا سنصبح زى الطفلين اللى واحد فيهم اشترى النُفّاخة والتانى طرشقها !!