﴿ وارسم شجر فى الريح !! ﴾ من اجمل القصائد العامية شعر محمود عبد الحفيظ

…. الليل جناين ذكريات ..
طايرة ف سماها ملَوِّنَة العصافير ..
آخر النهار بتحُطِّ عَ الشجر العَفِى ..
يدخل عليها الليل أمان ..
أنا لِسَّه فاكر علبة الألوان … أولى ابتدائى والطريق ..
من كل شارع فى البلد ..
ولحَدِّ باب المدرسة .. عصافير ..
وعيون من الشبابيك.. وعيون عَلَى سطوح البيوت ..
وقلوب بتِدعِى رَبِّنا الحَنَّان ..
…
🐎
…. أنا لِسَّه فاكر علبة الألوان ..
أرسم عصافير ع الشجر ..
وارسم عَلَى وِشِّ القَمَر .. ضحكة زمايلى الطيبين ..
فى المدرسة .. والغيط ..
بِنت الجِيران والبيت فى جَنب البيت ..
الفرحة فى عيونَّا وياما القَلب فيه ..
ليل الصِّبَا تباريح ..
وارسم شَجَر فى الرِّيح ..
و عيال ..
و يوم العيد ..
والَّلمَّة عَ المَرَاجِيح !!
…
🐎
… القَطر جاي رايح ينادى تُوووت ..
ليل الشِّتَا ضَلمَة ..
و خوف ..
و سكُووووووت ..
المُستَجَدِّين اللى لِسَّه يا دوووب …
عشرين سنة الَّا شهُور ..
وجبال خليج الزَّعفَرَانَة جبال ..
وإجابَة تايهَة مِن سُؤال ..
جَوَابَات بنِبعَتها يجينا الرَّدِّ كيف الحال ؟!
سينا اللى بِينَّا و بينها بَحرِ يَهُود ..
فى نشرة الأخبار يوماتى .. الحَقِّ بُكرَة يعُود !!
سينا اللى تطلع شمس كل صباح ..
تلَاقِيش عَلَى الأرض الطَّهُور ..
غير جيش احتِلَال !!
…
🐎
… أولى ابتدائى .. أولى إعدادى ..
و كان ياما كان ..
أنا لِسَّه فاكر مدرسة بَحرِ البَقَر ..
وتلامذة فى الشَّنطَة الكراريس الجديدة وْ ..
علبة الألوان ..
أرسم شجر ..
وارسم عَلَى بيوتنا الحزينة كَفِّ حِنَّة وْ سيف ..
افراحنا كانت فى الشِّتَا ..
والصِّيف ..
الدَّمعَة دى عَ الخَدِّ جاتنا منين ؟
واستَنَّى يحكِى لِى الحِكَايَة جَمَال !!
وان شاء الله يطلع بُكرَة أحلى نهار ..
…
🦜
… أُمِّى أنا ..
أُمِّى اللى عاشت فى انتظار ..
أرجع لها بكَرَّاسَة بيضا جديدة أوِّل سَطر مكتوب اعتِذَار ..
أُمِّى الجميلة الطيبة ..
شجرة كافور التِّرعَة والسَّاقيَة ..
شجرة كافور الضِّلِّ فارِد عَ المَحَطَّة والرَّصِيف ..
أرسم لها ..
مدفع ..و طَيَّارَة .. و عَلَم ..
وتلامذة بتحَيِّى العَلَم .. و طَابُور ..
وارسم لها ميادين ..
واطلع منابرها أنا واشرح أصول الدِّين ..
وارسم لها اولادها اللى جايِّبن عَ الطريق متوَحَّدِين ..
وارسم لها بيوت فَلَّاحِين ..
و غيطان عَمَار !!
..
… 🦜
يا قلبى يا عصفور عَلَى شجر الحكايات اللى فاتت ..
واللى جايَّة .. أمنِيَات ..
الليل جناين ذكريات ..
وعيون بَنَات الصُّبح بَدرِى باصَّة م الشبابيك ..
من فوق سطوح العِشقِ انا مُرسَل إليه ..
مرسل إليه يلقَى صباح الخير عَلَى بَابُه ..
يا الغالى ..
كيف الحال …
يا الغايب اللى طال قَوِى غيَابُه ..
يا المُستَجَدِّينِ اللى لِسَّه يا دوووب ..
﴿ عِشرِين سَنَة الَّا شهُور ﴾
خَمسِين سَنَة فَاتِت عَلَى ذِكرَى العُبُور ..
خَمسِين سَنَة مِستَنِّى لِسَّه أشُوف ..
المُستَجَدِّينِ اللى عَدُّوا البَحر ..
فى كشُوفِ الحُضُور !!