مبدعو مصر
فى إحدى القرى المجاورة لقريتنا يوجد ضريح الشيخ فرّاج ، الذى له كرامات كثيرة يعتقدوا بها أهل هذه القرية .. اللى عايزة تتجوز تزور ضريح الشيخ فرّاج وتلف حواليه وتدعى .. واللى عايزة تحبل تزور ضريح الشيخ فرّاج وتتمردغ فى الأرض جنب الضريح .. واللى عايز ياخد المعافاة من الجيش يعمل صُلحة للشيخ فرّاج ..واللى عايز ربنا يكرمه بولد يندُر جَدْي للشيخ فراج ، وف يوم كانت واحدة بتولد ، وكانت ولادتها متعسّرة ، والناس اتلمِّت على السراير قدّام البيت ، رجّالة مع حريم ، وفضلوا يدعوا ويتوسلوا للشيخ فرّاج ان ربنا ينتعها بالسلامة ، وفضلوا يقولوا يدّك معانا ياشيخ فراج … شالله ياشيخ فراج !! آدى ساعتك ياشيخ فراج …. نظرة ياشيخ فراج… فرِّج عليها ياشيخ فراج….والمرة تصرخ من قعف راسها .والناس مستنية ساعة الفرج ، والخلق منتظرة بركات الشيخ فراج ومفيش ولادة !! … وفيه واحد من الناس تِعِب م القعدة وخَد بعضه ومشى ، وهو مروِّح فى الطريق لقى واحد موقّع شيلة برسيم كبيرة من على الحمارة وعمّا يرفع فيها ويزعق ويقول يدّك معانا ياشيخ فراج ، فقام الراجل ضِحِك وقال له : لا بعيد عن شنبك ياحج ، ريِّح نفسك وشيل لوحدك ، الشيخ فراج عند المرَة اللى بتولد .. الشيخ فرّاج حيكفِّي كام يابلد باردة .. تعبتوا الشيخ فرّاج معاكم ياأنطاع !!.
قد يهمك أيضا