مبدعو مصر
فينه الولد ؟
فينه الولد ؟؟
صورته كانت على الحيطان
بس الحيط وقعت كمان
من كتير بأنبش عليه
في الحطام ألمس إيديه
رجعوا لي طب صباع
أو حتي فردة شراب
فيها رِحته مع التراب
اللي كان يمشي عليه
واد جميل كان شعره أيه
يشبه لشمس المغارب
كان بيحضن كل خُصلة
ويرسم بيها قلع قارب
رجعوه ماكفايا أبوه
طب سيبوا لي حتي ذكري
طرف فكرة
كان بيحلم بيها دايماً
أنه يبقي في يوم جسور
اسمه يلمع ذي نور
ويحسدوني كتير عليه
كان بيرسم بالرصاص
سجن وحكام وحراس
وألف علامة إنتصار
موشومه ف ضهر الكُراس
كان في فصله الألفه دايماً
كان بيحلم بالسلام
كان بيزرع الزيتون
كان بيعشق الحمام
بس بحلمه دمروا
طب معلشي رجعوه
طب هاتوه وكفنوه
عايزه أضمه في حضني ضمه
عايزه أشمه بس شمه
ولاقوا قبر وادفنوه
حد شاف إبني ياهووووو
واد جميل كان شعره كرلي
في الجمال يشبه أبوه
فينه إبني ؟؟