مبدعو مصر
عادي
انا من بعدك
عايش عادي
باكل واشرب
وبهزر ويا الناس.. عادي
واضحك واهرب
وابعد عن كل الناس.. عادي
يعنى.. انا زي زمان عادي
بحلم و ادروش وبحب
واحيانا نغزه تشك القلب
وان ضاقت بيا الدنيا بقول
يا حبيبي يا رب
ولا عايل هم
انا باهرب م الاحزان والغم
لسانى.. زي زمان عادي
ولا باشكي من ايها حاجه
مستغني.. عن ايها حاجه
واتجاهل ميت حاجه وحاجه
ما انت عارفني
وانا.. لسه زي زمان عادي
بتكلم عادي ف الهيافات
ولا بندم يوم علي شيء فات
ولا عايز من بكره حاجات
لكن.. عادي
عايش.. عادي
وبنام واصحي
واشعر احيانا بالفرحة
ايوا انا بفرح
واسهر واسرح
وبشوف الاشخاص حواليا
زي المسرح
هاكتب حكايتهم واحكيها
ولو اني مش شايفك فيها
لكن.. انا زي زمان عادي
صدقني.. انا عايش عادي
والله.. انا عايش عادي
كل الموضوع ان انا بعدك
مش حاسس اصلا بحياتي
ابنك / إسلام فرغلى