مبدعو مصر
أخدت من بين الدقايق
حلم رايق
ضحكه رايقه
بس نطت دمعه فايقه
بوّشت كُحلة عيوني
زادت الدمعات قصادي
زوّدت لحظات جنوني
والصدام كان ويّا عقلي
فجأه راحة بالي راحت
والنهارده شئ حصلّي
إلتقيتني غصب عنّي
بابكي واضحك
وارجع ابكي
وانزوي جنب المرايه
للي واقفه قصادها أشكي
ف تقابلني بضحكه بارده
منها تتجمد عروقي
وتقابلني بنظره شامته
صمت صوتها يقوللي دوقي
مُر صبر الوحده قاسي
واللي أقسي …
تلج شمسي اللي ف شروقي
فجأه شئ يخطفني منّي
والقى عقلي يقوللي فوقي
ألتفت بعيوني فوقي
ألقى لسّه اللمبه قايده
فات ساعات سرحانه فيهم
فات ساعات وانا لسّه قاعده
ضي م اللمبه مشاركني
كل ثانيه تفوت ف وِحده
والغريب منّه النهارده
إني شوفته بيبتسملي
والتقيتني بابتسمله
وانّي حسّيت قلبه طيّب
بيحاوطني بنوره كُلّه
قلبي ويّا دفاه حصلُّه
حاله م الصمت الإيجابي
ضي لمبه فتحلي بابي
ربما على ألف معنى
منها لمّا الناس بتقسى
يبقى حضن الوِحده جنّه
والليالي الصعبه لمّا
يبقى فيها الغش واضح
إوعى قلبك يبقى فاتح
أي باب من أي نوع
إوعى تسمح للدموع
تبقى مطره تهد نفسك
حط يومك جنب أمسك
ويّا بعض ف قلب صُره
حطها على جنب وابدأ
تمسح الفايت وحاول
تفتح الأحضان لبكره
بعد بكره
بعد بعده
كل شئ ح يلاقي وعده
والأمل دايما منوّر
حتى لو كان ..
ضي لمبه
