مبدعو مصر
صباح الخير علي ضفايرك
ياطفله بتشبه العواجيز في شيل الهم
خانوكي ولسه بتراضي ف عديم الدم
وناسيه ابن الحلال جدا ورغم دا كله شايفك ام
بتعالج امام القصر من مرضي
وبشرب دم من نيلك ياريت ترضي
انا ابنك ف عيدي بس تقديرك
بلاش تبتسمي للي اغتصب خيرك
وخلينا في تفكيرك
……….
ياضماير الخلق العدمانه
ياشراع الفلك الغرقانه
يادموع البنت المتخانه
بتراضو ف واحد شقو الخوف
خلاه ملهوف
بقي شبه الورده الدبلانه
شئ مش مقنع !!!
اني ازرع خير يطرحلي فجور
اني ابقي بدور ف بلاد وكفور
ف وشوش الناس البهتانه
جايز اشوفك مره واعاتبك
ويجوز تبقي انتي المظلومه
ف نلملم شوقنا واخطائنا
ونعيد الحسبه المحسومه
يطلع مجموعها فراق وانين
وتشوفي الراحه ف ناس تانيين
ياحمام بيحوم علي غيه اتقفلت ابوابها
ياعجوزه بتفقد احفادها
ياعساكر شاطره ف ضرب النار
دا صميم الغايه الاستقرار
شئ مش مقنع !!!
اهديكي ف عز اساكي ورود
تهديني ف عز الفرحه باروود
اكتبلك وقت الحرب جواب
واتمني تكوني لقلبي ثواب
القاكي عقاب
من غير اسباب بتخوني العهد
وبتلغي الفكره المرغوبه ان احنا لبعض
ياحروب تلقيحها سلام مسموم
ياسماء خلفتها غيوم في غيوم
ياصراخ وف جوف مظلوم مكتوم
هديتو طموح وكيان انسان
كان بادئ يبني ف امجاده
مايهمش خالص اسعاده
قدر مايركع لميول بتخرب ف بلاده
محبوس بجريمة ل ستفسار
محروم من نعمة ل ستغفار
حاسس بحصار
………….
بالمعني المقصود حرفيا مالكه الاحساس
وبشوفك جوا وشوش الناس
زي الاحزان ماتعشش جوا ضلوع مظلوم
زي الحرمان مايبان ف عيون واحد محروم
اعجابي بحسنك كان واضح
بس انتي بطبعك كارهه اللوم
او شايفه اليوم / بعيون بكره
العالم كله بيتقدم
انا لسه بعيش علي كام ذكري
ياشيوخ بتحلل ف المحظور
يالصوص مش حبه تعيش ف النور دجال وبيكشف ف المستور
والجهل بيسمح لاصحابه بإتقانه الدور
حالك كما حال الوطن
شايفاني ليه دايما غبي
بانيه ضريح للاجنبي
يتلف حواليه الخدم
وجه التشابه بين حبيبتي والوطن
بحبهم وهما شايفني عدم
وائل سعيد القناطر الخيريه _ القليوبيه مواليد 29 / 10 1984